ताप्लेजुङ, जेठ ५ गते । ताप्लेजुङमा बिहीबार राति ट्याक्टर दुर्घटना हुँदा सहचालकको मृत्यु भएको छ । प्रहरीका अनुसार खाम्लुङको दोभान बजारदेखि ढुङ्गे साँघुतर्फ जाँदै गरेको को २ त ७८७७ नम्बरको ट्याक्टर दुर्घटना हुँदा सहचालक जिल्लाकै फक्ताङ्लुङ गाउँपालिका –३ लिङ्खिम सिँवाका २० वर्षीय सन्दीप तामाङको मृत्यु भएको हो ।
आठराई त्रिवेणी गाउँपालिका र मैवाखोला गाउँपालिकाको सिमाना सुन्तले नजिक देवीखोल्सामा ट्याक्टर अनियन्त्रित भई दुर्घटनामा परेको हो । सो दुर्घटनामा ट्याक्टरका सहचालक तामाङको घटनास्थलमै मृत्यु भएको जिल्ला प्रहरी कार्यालय ताप्लेजुङले जानकारी दिएको छ ।
ट्याक्टर राति करिब ८ः४० बजेतिर दुर्घटना भएको मैवाखोला गाउँपालिका–१ ढुङ्गेसाँघुका वडाध्यक्ष चन्द्रकुमार तामाङले जानकारी दिनुभयो । शुक्रवार बिहानै जिल्ला प्रहरी कार्यालयबाट प्रहरी टोली घटनास्थलतर्फ गएको बताइएको छ । ट्याक्टरका चालक कुशल लिम्बू भने फरार रहेका प्रहरीले जनाएको छ ।
उहाँ ताप्लेजुङबाट गोरखापत्रमा रिपोर्टिङ गर्नुहुन्छ ।
