इनरुवा समाचारदाता
इनरुवा, वैशाख १९ गते । इनरुवा नगरपालिका–४ को हनुमान चोकदेखि सीमावर्ती देवानगञ्ज गाउँपालिकासम्म जोड्ने सडकको शिलान्यास गरिएको छ।
पूर्वसञ्चार तथा सूचना प्रविधिमन्त्री तथा सुनसरी–४ बाट निर्वाचित प्रतिनिधि सभा सदस्य ज्ञानेन्द्रबहादुर कार्कीले सोमबार शिलान्यास गर्नुभएको हो। कोशी प्रदेश सरकारको भौतिक पूर्वाधार विकास मन्त्रालयको बजेटबाट सो सडक निर्माण हुन लागेको हो।
पूर्वाधार विकास कार्यालयका सुशील श्रेष्ठका अनुसार बहुवर्षे योजनाअन्तर्गतको २३ किलोमिटर सडकमध्ये हाल १०.५ किलोमिटरका लागि अहिले ठेक्का लागेको छ। यो कार्य तीन वर्षमा पूरा गर्नुपर्ने उहाँले जानकारी दिनुभयो। महाविर इन्जिनियरिङ एन्ड कन्स्ट्रक्सन प्रालि काठमाडौँले ३२ करोड ८३ लाख पाँच हजार ८०३ रुपियाँमा ठेक्का पाएको छ।
शिलान्यास कार्यक्रममा कोशी प्रदेशका भौतिक पूर्वाधारमन्त्री दुर्गा चापागार्इं, इनरुवा नगरपालिकाका प्रमुख केदार भण्डारी, जिल्ला समन्वय समितिका प्रमुख राजन मेहता, सुनसरीका प्रमुख जिल्ला अधिकारी हुमकला पाण्डेलगायत उपस्थित हुनुहुन्थ्यो।
