काठमाडौँ, वैशाख १९ गते । शुक्रबार प्रदर्शन भएको चलचित्र ‘कैदीको पत्र’ले दर्शकबाट राम्रो प्रतिक्रिया पाएको छ । देशभरका चलचित्र भवनमा चलचित्र हेरेका दर्शकले चलचित्र मन पराएका छन् ।
नयाँ कलाकारको काम, नेपाली चलचित्रमा विदेशी कलाकारका साथै स्कटल्यान्डका मनोरम दृश्यहरूसँगै चलचित्रको कथा र प्रस्तुतिलाई दर्शकले रुचाएका छन् । सम्पूर्ण छायाङ्कन स्कटल्यान्डमा भएको यो चलचित्रलाई सनमकुमार बैरागले निर्देशन गर्नुभएको हो । निर्देशक बैरागले आफूले लामो समय लगाएर बनाएको चलचित्रमा दर्शकको रुचि राखेकोमा खुसी व्यक्त गरे ।
चलचित्रमा समावेश सबै गीतमा शब्द, चलचित्रको पटकथा तथा संवाद निर्देशक बैरागको रहेको छ । साहित्यकार स्व. ईश्वर मानन्धरको कथा ‘कैदीको पत्र’मा आधारित रही चलचित्र निर्माण गरिएको हो । चलचित्रमा कुनाल विश्व र ब्रिटिस अभिनेत्री म्याडिसन लाजारस, सलिना थापामगर, पृथ्वीराज खत्री, सुवर्ण थापालगायतको अभिनय छ ।
