मकवानपुर समाचारदाता
हेटौँडा, वैशाख ११ गते । बागमती प्रदेशका प्रदेश प्रमुख यादवचन्द्र शर्माले लोकतन्त्र दिवसले देशलाई समृद्धिको पथमा लैजान सबैलाई प्रेरित गर्ने विश्वास व्यक्त गर्नुभएको छ।
१७औँ लोकतन्त्र दिवस (वैशाख ११ गते सोमबार)को अवसरमा शुभकामना व्यक्त गर्दै प्रदेश प्रमुख शर्माले देश र जनतालाई सर्वोपरि ठानी लोकतन्त्रलाई दिगो र दरिलो बनाउनुपर्नेमा जोड दिनुभएको छ। आइतबार उहाँले जारी गर्नुभएको शुभकामना सन्देशमा भनिएको छ, “विकास, स्थिरता, सुशासन तथा समृद्धिको पथमा अगाडि बढ्न यो दिवसले सबैलाई प्रेरित गरोस् भन्ने कामना गर्दछु।”
आफ्नो जीवनलाई लोकतान्त्रिक मूल्य, मान्यता, आदर्श र सिद्धान्तप्रति समर्पित सम्पूर्ण लोकतान्त्रिक योद्धाप्रति उच्च सम्मान प्रकट गर्दै प्रदेश प्रमुख शर्माले लोकतन्त्र स्थापनाका लागि आफ्नो अमूल्य जीवन उत्सर्ग गर्ने शहीदप्रति भावपूर्ण श्रद्धाञ्जली अर्पण गर्नुभएको छ।
प्रमुख शर्माले २०६२/६३ को आन्दोलन र यही बलिदानको जगमा खडा भएको सङ्घीयता, गणतन्त्र, धर्मनिरपेक्षता र समानुपातिक समावेशीसहितको संविधान प्राप्त गरी अधिकार सम्पन्न नागरिक भएका उल्लेख गर्दै हामीले इतिहासप्रति सदैव गौरवबोध गर्नुपर्ने प्रदेश प्रमुख शर्माद्वारा जारी शुभकामना सन्देशमा भनिएको छ।
