सरकारले जनतासँग गरिएको प्रतिबद्धता पूरा गर्छ : रक्षामन्त्री खड्का

सुर्खेत, चैत २७ गते । उपप्रधान तथा रक्षामन्त्री पूर्णबहादुर खड्काले अहिले सरकार निर्वाचनकै बेलाको गठबन्धनअनुसार बनेकाले जनतासँग गरिएका प्रतिबद्धता पूरा गर्नेगरी सरकारले काम गर्ने बताउनुभएको छ । 

नेपाली कांग्रेस सुर्खेत क्षेत्र नम्बर–२ को प्रथम क्षेत्रीय अधिवेशनको सोमबार पन्चपुरी नगरपालिकाको बावियाचौरमा उद्घाटन गर्दै उपप्रधानमन्त्री खड्काले शान्ति प्रक्रियालाई पूर्णता दिन, संविधानको सुदृढीकरण गर्न र देशको तीव्र विकासका लागि वर्तमान सरकारले काम गर्ने बताउनुभयो । 

उपप्रधानमन्त्री खड्काले भन्नुभयो, ‘‘संघ र प्रदेशको निर्वाचनमा जनतासँग हामीले मत माग्दा शान्ति प्रक्रियालाई पूर्णता दिन्छौं, संघीय लोकतान्त्रिक गणतन्त्रलाई सुदृढीकरण गर्छौं, तीव्रतर गतिमा देशको विकास गर्छौं भनेका थियौं, चुनावका बेला मतदातासँग गरिएका बाचा अनुसारका काम गर्न अहिलेको सरकार लागिरहेको छ ।’’

उपप्रधानमन्त्री खड्काले द्वन्द्व पीडितहरूलाई न्यायिक निरूपणमार्फत न्याय दिने र आर्थिक प्याकेजमार्फत परिपूरण र राहत उपलब्ध गराइने पनि बताउनुभयो । 

उहाँले पुस १० गते बन्नुपर्ने सरकार चैत १७ गते बनेको बताउँदै यो बीचको समय खेर गएको धारणा राख्दै एजेण्डामा सहमत भएका दलहरू एक ठाउँमा रहेकाले ती एजेण्डाहरु पूरा हुने बताउनुभयो । 

सरकारले अहिले सार्वजनिक गरेको न्यूनतम साझा कार्यक्रमको जगमा टेकेर बजेट ल्याउने उहाँको भनाइ छ । कर्णालीमा भएका विकासका बहुआयामिक सम्भावनालाई सदुपयोग गर्दै विकासको गतिलाई तीव्र पार्नेगरी केन्द्रबाट विशेष बजेटको व्यवस्था गर्ने प्रतिबद्धता पनि उहाँले जनाउनुभएको छ ।