अमरराज नहर्की
तनहुँ, चैत १८ गते । तनहुँमा ट्याक्टर दुर्घटना हुँदा एक जनाको मृत्यु भएको छ । एक जना घाइते हुनुभएको छ । डुम्रे–वेशीसहर सडक खण्डमा पर्ने तनहुँको भानु नगरपालिका –२ भकुन्थोकबाट मल बोकेर वेशीसहर जाँदैगरेको बा ३००१ त २२६ नम्बरको ट्याक्टरको इन्जिन र ट्रली जोड्ने भाग भाँचिएर दुर्घटना भएको प्रहरीले जनाएको छ ।
भानु नगरपालिका –२ बस्ने वर्ष ४१ को ईश्वर अधिकारीको मृत्यु भएको जिल्ला प्रहरी कार्यालय तनहुँका प्रहरी उपरीक्षक मोहनबहादुर खाणले जानकारी दिनुभयो । शुक्रबार भएको दुर्घटनामा कम्मर ढाँडमा गम्भीर चोट लागेपछि पुरानो मेडिकल हल भरतपुरमा उपचारका लागि लगिएको प्रहरीको भनाइ छ ।
गम्भीर घाइते हुनुभएको वर्ष १७ को समीर अधिकारीको सोही मेडिकल हलमा उपचार भइरहेको खाणले बताउनुभयो । मृतक अधिकारी घाइते अधिकारीको बुवा रहेको प्रहरीले जनाएको छ । त्यसैगरी वर्ष ३९ को दीपक नेपालीको दायाँ खुट्टामा सामान्य चोट लागेको र उहाँको पनि सोही ठाउँमा उपचार भइरहेको खाणले जानकारी दिनुभयो ।
