हुम्ला समाचारदाता
हुम्ला, फागुन २६ गते । कर्णाली कोरिडोरको हुम्ला खण्डअन्तर्गत मैला कवाडीदेखि सलीसल्लासम्मको सडकमा यातायात सञ्चालनका लागि अनुमति दिइएको छ।
जिल्ला ट्राफिक कार्यालय प्रहरी नायब निरीक्षक कलकबहादुर शाहीका अनुसार ताँजाकोट गाउँपालिकाको कवाडीदेखि सर्केगार्ड गाउँपालिकाको सलीसल्लासम्मको सडकमा यातायात सञ्चालनका लागि ‘रुट परमिट’ दिइएको छ।
सो खण्डको ३९ किलोमिटर सडकमा सार्वजनिक तथा निजी सवारीसाधन सञ्चालन हुँदै आएका छन्। यसअघि यातायात कार्यालयबाट रुट परमिट प्राप्त नहुँदा सवारीसाधन सञ्चालनमा आए पनि विविध समस्या आउने गरेका थिए। सो सडकमा रुट परमिट प्राप्तपछि कवाडी र सर्केगार्डमा ट्राफिक प्रहरीले सुरक्षा बढाएको छ।
प्रहरीले सो क्षेत्रमा नियमित जाँचसमेत गर्दै आएको छ। रुट परमिट प्राप्तपछि कालो नम्बर प्लेटका गाडीले यात्रु बोक्न थालेका छन्। त्यसअघि रातो नम्बर प्लेटका गाडीले यात्रु ओसार्दै आएका थिए।
उहाँले अब गाडी दुर्घटना भए यात्रुको बीमा तथा उपचारका लागि समेत सहज कानुनी उपचार खोज्न सकिने भएको बताउनुभयो।
दक्षिणी क्षेत्र राष्ट्रिय सडक सञ्जालसँग जोडिए पनि उत्तरी हुम्लामा स्थानीय स्तरमा सडक निर्माण भए पनि सवारीसाधन सञ्चालनमा आएका सडकका लागि भने रुट परमिटबिना सवारीसाधन सञ्चालनमा आएका छन्।
