काठमाडौं, फागुन २५ गते । मार्क इन्टरनेशनल किड्नी सेन्टरले निःशुल्क मिर्गौला परीक्षण शिविर सञ्चालन गरेको छ । सेन्टरको चौथो वार्षिकोत्सव एवम् विश्व मिर्गौला दिवसको अवसरमा निःशुल्क मिर्गौला परीक्षण शिविर सञ्चालन गरेको हो ।
सेन्टरका अध्यक्ष अर्चन शम्शेर राणाले सेन्टरमा बिहान १० बजेदेखि ५ बजेसम्म सञ्चालन हुने शिविर आज (बिहीबार) र भोलि (शुक्रबार) गरी दुई दिनसम्म सञ्चालन हुने जानकारी दिनुभयो ।
यसैगरी, सेन्टरले फागुन २७ गते शनिबार ८ बजेदेखि २ बजेसम्म निःशुल्क स्वास्थ्य परीक्षण शिविर एवम् रक्तदान कार्यक्रम गर्ने पनि राणाले बताउनुभयो । सेन्टरले बिहीबार दरबार मार्गमा वाकथुन गरी मिर्गौला दिवस मनाएको छ ।
