पहिचानको खोजी

अस्ट्रेलिया, युरोप, अमेरिकामा 

अस्तित्व खोज्ने हामी नेपाली, 

खै त नेपालमा ?

विकसित र विकासोन्मुख 

त केबल माध्यम मात्रै हो, 

महìव त देशको अस्तित्वको हो । 

देशमा नयाँ कानुन बन्यो भन्छन्, 

खै त नयाँ कानुन ? 

देशमा नयाँ बिहानी आयो भन्छन्, 

खै त नयाँ बिहानीको आभास ? 

नेपाल बन्नलाई अझै कति 

निर्मलाको बलि चड्नुपर्ने होे  ?

त्यसैले आज म खोज्दै छु आफ्नै देशभित्र, 

देशको अस्तित्व, नेपालको अस्तित्व । 

विश्वभर गितार र पियानो गुन्जिँदा, 

मादल र ढोलकी बज्ने कहिले ?  

जापान, कोरियाको विकास हुँदा, 

नेपालको विकास हुने कहिले ? 

बुद्ध, सीता, भृकुटीको प्राचीन 

आदर्शले फैलिएको नेपाल, 

आज त्यो आदर्श कहाँ खोजौँ ? 

विश्वको शिर सगरमाथाजस्तै उच्च मेरो देश 

भ्रष्टाचार, बेथिति र अराजकताले थला परेको छ । 

त्यसैले, आज आफैले आफैँलाई सोध्नु छ, 

खै कहाँ छ मेरो देश ? 

खै त नेपाली मन र नेपालीपन ? 

खै त नेपालीको गौरवमय पहिचान ?