प्रधानमन्त्री प्रचण्डद्वारा नेता उपाध्यायप्रति श्रद्धाञ्जलि अर्पण

काठमाडौं, फागुन २२ गते । प्रधानमन्त्री पुष्पकमल दाहाल ‘प्रचण्ड’ले शनिबार निधन हुनुभएका नेकपा (एकीकृत समाजवादी) का नेता सरोजकुमार उपाध्यायप्रति श्रद्धाञ्जलि अर्पण गर्नुभएको छ । एकीकृत समाजवादीको केन्द्रीय कार्यालय आलोकनगरमा पुगेर प्रधानमन्त्री प्रचण्डले नेता उपाध्यायप्रति श्रद्धाञ्जलि अर्पण गर्नुभएको हो ।

शनिबार काठमाडौंको शङ्खमूलस्थित एक रेष्टुरेन्टबाट खसेर नेता उपाध्यायको निधन भएको थियो । उपाध्याय एकीकृत समाजवादीका अध्यक्ष एवम् पूर्वप्रधानमन्त्री माधवकुमार नेपालका भाइ हुनुहुन्छ ।

प्रधानमन्त्री प्रचण्डले अध्यक्ष नेपाल र उहाँको  परिवारजनमा समवेदना व्यक्त गर्नुभएको थियो । दिवङ्गत नेता उपाध्यायको अन्तिम श्रद्धाञ्जलिका लागि पार्थिव शरीर पार्टी कार्यालयमा राखिएको थियो । एकीकृत समाजवादीका नेता तथा कार्यकर्ताले पनि दिवङ्गत नेता उपाध्यायप्रति श्रद्धाञ्जलि अर्पण गर्नुभएको थियो । रासस