सर्लाहीको बाँके जङ्गलमा दुर्घटना, एक जनाको मृत्यु

जनार्जन खत्री

सर्लाही, फागुन २१ गते । पूर्व–पश्चिम राजमार्गअन्तर्गत सर्लाहीको बाँके जङ्गलमा पिकअप र अटो ठोक्किँदा एक जनाको मृत्यु भएको छ । दुर्घटनामा धनुषाको मिथिला नगरपालिका–१०, का ३४ दीपक स्याङतानको मृत्यु भएको हो । उहाँलाई लालबन्दीमा सामान्य उपचार गरी शनिबार साँझ थप उपचारका लागि वीरगन्ज पुर्‍याउँदा चिकित्सकले मृत घोषणा गरेको प्रहरीले जनाएको छ । 

फूलजोर चोकबाट पाँच किलोमिटर पूर्वतर्फ पश्चिमबाट आइरहेको बागमती प्रदेश ०१–०२५ च ००७ नम्बरको पिकअप र विपरीत दिशाबाट गइरहेको प्रदेश २–०२–००१ ह ०३३३ नम्बरको अटो आपसमा ठोक्किएर दुर्घटना भएको जिल्ला प्रहरी कार्यालय मलङ्गवाले जनाएको छ । 

दुर्घटनामा पिकअपका चालक धादिङको थाक्रे गाउँपालिका–११, का २३ वर्षीय सुनिल सुनुवार सामान्य घाइते हुनुभएको छ । उहाँलाई लालबन्दीमा सामान्य उपचार पश्चात् आइतबार बिहानबाट प्रहरीले हिरासतमा लिइसकेको छ । तीव्र गतिका कारण दुई सवारी एकआपसमा ठोक्किएको प्रहरीको प्रारम्भिक अनुसन्धानमा उल्लेख छ ।