स्कुल बसको ठक्करबाट वृद्धको मृत्यु

अविनाश चौधरी

धनगढी, फागुन २० गते । कैलालीमा स्कुल बसको ठक्करबाट एक वृद्धको ज्यान गएको छ । गोदावरी नगरपालिका–६ खैरानामा रहेको माउन्ट सैपाल स्कुलको से १ क ४४१ नम्बरको बसको ठक्करबाट सोही ठाउँका ६५ वर्षीय बाटुबट्टे आलेमगरको मृत्यु भएको छ । 

शैक्षिक भ्रमणका लागि विद्यार्थी लिएर बर्दियातर्फ जाँदै गरेको बसले आज बिहान पूर्वपश्चिम राजमार्गमा पैदलयात्री वृद्धलाई ठक्कर दिएको थियो । जिल्ला प्रहरी कार्यालयका अनुसार बसको ठक्करबाट घाइते वृद्धको सेती प्रादेशिक अस्पतालमा उपचारको क्रममा ज्यान गएको हो । बस र चालक धनगढी उपमहानगरपालिका–१३ का ३५ वर्षीय खुशीराम चौधरीलाई प्रहरीले नियन्त्रणमा लिएको छ । 

वृद्धको ज्यान गएपछि क्षतिपूर्ति र चालकमाथि कारबाहीको माग गर्दै स्थानीयवासीले पूर्व–पश्चिम राजमार्ग अवरुद्ध गरेका थिए । अहिले राजमार्ग खुलिसकेको जिल्ला प्रहरी कार्यालयका प्रहरी नायब उपरीक्षक कुलदीप चन्दले जानकारी दिनुभयो ।