काठमाडौँ, फागुन १५ गते । नेपाल वायुसेवा निगमको ए ३२०–२०० सिरिजको न्यारो–बडी जहाज दुबईमा ग्राउन्डेड भएको छ। आइतबार दुबईबाट काठमाडौँ आउने तयारीका क्रममा इन्जिनको दायाँ भागमा ओभर हिट भएपछि ग्राउन्डेड गरिएको हो।
निगमका प्रवक्ता अर्चना खड्काका अनुसार आइतबार बिहान १० बजे काठमाडौँ अवतरण गरिसक्नुपर्ने जहाजमा प्राविधिक समस्या देखिएपछि ग्राउन्डेड भएको हो।
उहाँले भन्नुभयो, “जहाजमा आएको समस्या पहिल्याउन इन्जिनियरिङ चेकजाँच भइरहेको छ। आइतबार अबेरसम्म प्राविधिक समस्याको समाधान नभए अर्काे जहाजबाट यात्रुलाई नेपाल ल्याइनेछ।” जहाजमा के समस्या भएको हो भन्नेबारे उहाँले खुलाउनुभएन।
निगम स्रोतका अनुसार जहाजको इन्जिनमा आएको ओभर हिटका विषयमा अध्ययन भइरहेकाले आइतबार नै जहाज नेपाल आइपुग्ने सम्भावना न्यून रहेको छ। जहाज नेपाल नआउने भएपछि १५० यात्रु रहेको उक्त उडानका सबै यात्रुलाई दुबईकै पाँचतारे होटलमा राख्ने तयारी भइरहेको छ। यसले निगमको सञ्चालन खर्चमा थप भार पुग्ने देखिन्छ।
त्यो जहाजको इन्जिनमा यसअघि पनि यस्तै प्रकारको समस्या देखिएको थियो। निगमको अर्को जहाजमा भने केही समयअघि समस्या आएर इन्जिन नै परिवर्तन गरिएको छ।
ग्राउन्डेड जहाजको पनि इन्जिनमा समस्या देखिएपछि फेर्नुपर्ने वा मर्मत गरेर उडाउन मिल्ने भन्ने विषयबारे अध्ययन भइरहेको निगम स्रोतले जनाएको छ।
