रमेश विश्वकर्मा
गुल्मी, माघ २७ गते । गुल्मीको धुर्कोट गाउँपालिका –२, पीपलधारामा ट्याक्टरले किच्दा एक जनाको मृत्यु भएको छ । लु ४ त ७६५६ नम्बरको ट्याक्टरले सोही स्थानका २२ वर्षीय सुवास परियारको मृत्यु भएको हो ।
नादी खोलाबाट बालुवा बोकेर पीपलधारा जाँदैगरेको ट्याक्टरमा सवार परियार दिउँसो साढे ४ बजे ट्याक्टरबाट खसेका थिए । उहाँ खस्दा ट्याक्टरले किचेको प्रहरीको भनाइ छ । उहाँ सोही ट्याक्टरको सहचालक रहनुभएको छ ।
ट्याक्टरका चालक सागर र ट्याक्टरलाई जिल्ला प्रहरी कार्यालय गुल्मीले नियन्त्रणमा लिएको छ । मृतक सुवासको शव पोष्टमार्टमका लागि गुल्मी अस्पताल ल्याइएको छ । घटनाको अनुसन्धान भइरहेको प्रहरीले जनाएको छ ।
