ट्याक्टर दुर्घटना हुँदा एक जनाको मृत्यु, एक जना घाइते

राजु लामिछाने 

रुकुमपश्चिम, माघ १८ गते । रुकुमपश्चिममा ट्याक्टर दुर्घटना हुँदा एक जनाको मृत्यु भएको छ । मङ्गलबार राति जिल्लाको मुसीकोट नगरपालिका –१४ छिवाङ ज्युलास्थित डुडे बगरमा ट्याक्टर दुर्घटना हुँदा एक जनाको मृत्यु भएको हो भने एक जना घाइते भएका छन् ।

जिल्ला प्रहरी कार्यालयका सूचना अधिकारी प्रहरी निरीक्षक राजीव श्रेष्ठका अनुसार ट्याक्टर दुर्घटनामा परेर भेरी नगरपालिका –१ जाजरकोटका अन्दाजी ३४ वर्षीय हरिबहादुर विकको मृत्यु भएको हो । विक ट्याक्टरको सहचालक हुनुहुथ्यो । उपचारका लागि जिल्ला अस्पताल सल्लेमा लगिएकाे बेला उहाँलाई मृत घोषणा गरिएको थियो ।

दुर्घटनामा परेर ट्याक्टर चालक मुसिकोट नगरपालिका ६ घोरखानीका २२ वर्षीय मनबहादुर विक घाइते हुनुभएको प्रहरीले जनाएको छ । घाइतेको स्वास्थ्य अवस्था गम्भीर छ। उहाँलाई थप उपचारका लागि नेपालगन्ज पठाइएको छ ।  

मुसीकोट नगरपालिका –४ सोलावाङबाट सानीभेरी गाउँपालिकाको सिम्लीतर्फ जाँदै गरेको ना ६ त ७७१३ नम्बरको ट्याक्टर दुर्घटना भएको प्रहरी निरीक्षक श्रेष्ठले जानकारी दिनुभयो । उहाँका अनुसार ट्याक्टर सडकबाट करिब २०० मिटर तल खसेको थियो ।