बसको ठक्करबाट एकको मृत्यु

अर्जुन काफ्ले

स्याङ्जा, माघ १४ गते । पुतलीबजार नगरपालिका ११ करेन्डाडाँमा बसको ठक्करबाट एक ज्येष्ठ नागरिकको मृत्यु भएको छ । घरबाट बाहिर निस्कनुभएका ७२ वर्षीय यमबहादुर जिटीको बसको ठक्करबाट घटनास्थलमा मृत्यु भएको प्रहरी निरीक्षक पदम थापाले बताउनुभयो । 

सुनौलीबाट स्याङ्जा आउदैगरेको ना ४ ख ३८२८ नम्बरको बसले उहाँलाई आफ्नै घर नजिकै ठक्कर दिएको हो । प्रहरीले सवारी साधन र चालकलाई नियन्त्रणमा लिएको छ । शव जिल्ला अस्पताल स्याङ्जामा राखिएको छ । दुर्घटनापछि आक्रोशित परिवार र स्थानीयले चार घण्टा सिद्धार्थ राजमार्ग अवरुद्ध गरेका थिए ।