बार्सिलोना सेमिफाइनलमा

काठमाडौं, माघ १२ गते । बार्सिलोना स्पेनिस कोपा डेल रे फुटबलको सेमिफाइनलमा प्रवेश गरेको छ । घरेलु मैदानमा बुधबार राति भएको खेलमा बार्सिलोनाले रियल सोसिडाडलाई १–० गोलले हरायो । 

बार्सिलोनाको जितमा औसमाने डेम्लेबेले निर्णायक गोल गर्नुभयो । डेम्बेलेले ५२औँ मिनेटमा गोल गर्नुभएको थियो । सोसिडाडमाथि लगातार गोलको अवसर बनाएपनि बार्सिलोनालाई गोल गर्न निकै सङ्घर्ष गर्नु परेको थियो । सोसिडाड ४०औँ मिनेटमा १० खेलाडीमा समेटिएको थियो ।

ब्राइस मेन्डेसले बार्सिलोनाका सर्जियो बुस्क्वेटमाथि फल खेलेपछि रातो कार्ड पाउँदै बाहिरिनु भएको थियो । तर पनि बार्सिलोनाले थप फाइदा उठाउन सकेन । बुधबार राति नै भएको अर्को क्वार्टरफाइनल खेलमा ओसासुनाले सेभियालाई २–१ गोलले हराएको छ ।

ओसासुनाले अतिरिक्त समयमा पुगेर जित निकालेको हो । ओसासुनाको जितमा चिमी एभिलाले ७१औँ र एब्डेसमाड इजालजोउलीले ९९औँ मिनेटमा गोल गर्नुभयो । यसअघि सेभियाका युसुफ इन नासरीले दोस्रो हाफको इँन्जुरी समयमा गोल गर्दै खेललाई अतिरिक्त समयमा लम्ब्याउनु भएको थियो । एजेन्सी