काठमाडौं, माघ ९ गते । एनएसजेएफ पल्सर स्पोर्ट्स अवार्डको १९औँ संस्करण फागुन २३ गते हुने भएको छ । आयोजक नेपाल खेलकुद पत्रकार मञ्चले सोमबार एक कार्यक्रमबीच अवार्डको घोषणा गरेको हो ।
अवार्डमा २०७८ सालमा उत्कृष्ट प्रदर्शन गर्ने खेलाडी, प्रशिक्षक र खेलकर्मीलाई सम्मान गरिने बताइएको छ । काठमाडौं कमलादीस्थित प्रज्ञा भवनमा आयोजना हुने अवार्डमा यसपटक नौ विधा समावेश गरिएको मञ्चले जनाएको छ ।
जसमा वर्षको उत्कृष्ट खेलाडी पुरुष, वर्षका उत्कृष्ट खेलाडी महिला, वर्षका उत्कृष्ट खेलाडी युवा, वर्ष प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियन स्पोर्ट्स जर्नालिष्ट अवार्ड रहेको छ।
वर्ष खेलाडी पुरुष, महिला, पिपल्स च्वाइस, प्रशिक्षक र युवा विधाका विजेतालाई पल्सर मोटरसाइकल पुरस्कार प्रदान गरिने छ । अन्य विधाका विजेतालाई जनही ५० हजार रुपियाँ र आकर्षक उपहार प्रदान गरिने बताइएको छ ।
मञ्चले सोमबार नै अवार्डको मुख्य प्रायोजकको रूपमा हंशराज हुलासचन्द एण्ड कम्पनी प्रालिसँग सम्झौता पनि गरेको छ । सम्झौता पत्रमा मञ्चका अध्यक्ष दुर्गानाथ सुवेदी (देवेन्द्र) र कम्पनीका निर्देशक अभिमन्यु गोल्छाले हस्ताक्षर गर्नुभयो । सम्झौता पाँच वर्षको लागि गरिएको बताइएको छ ।
