पच्चीस करोडको कारोबार

चितवन समाचारदाता

चितवन, माघ ५ गते । नारायणी नदी किनारमा आयोजना गरिएको चितवन महोत्सव बुधबार सम्पन्न भएको छ । महोत्सवले २५ करोड रुपियाँको कारोबार गरेको छ । 

पुस २५ देखि माघ ४ गतेसम्म सञ्चालन भएको महोत्सवमा अपेक्षा गरेअनुसारको दर्शकको उपस्थितिले कारोबार हुन सफल भएको उद्योग वाणिज्य सङ्घ चितवनका अध्यक्ष एवं १४औँ चितवन महोत्सव मूल समिति संयोजक चुननारायण श्रेष्ठले जानकारी दिनुभयो । 

“हामीले यस महोत्सवबाट २५ करोड रुपियाँको व्यापार हुने तथा पाँच लाख दर्शकले अवलोकन गर्ने अपेक्षा गरेका थियौँ । त्यहीअनुसारको अवस्था भयो,” उहाँले भन्नुभयो । कोरोना महामारी र उच्च ब्याजदरका कारण आर्थिक क्षेत्र सुस्ताएका बेला महोत्सवले अर्थतन्त्रलाई चलायमान बनाउन मद्दत गरेको उहाँले बताउनुभयो । बुधबार आयोजित समापन कार्यक्रममा बागमती प्रदेशका आर्थिक मामिला तथा योजनामन्त्री जगन्नाथ थपलियाले जिल्लामा हुने हरेक मेला महोत्सवले देशको अर्थतन्त्र चलायमान बनाउन भूमिका निर्वाह गर्ने बताउनुभयो । चितवन महोत्सव जिल्लाकै ब्रान्ड भनेको भन्दै महोत्सवले स्थानीय उत्पादनलाई प्रवद्र्धन गर्नु सराहनीय कुरा भएको थपलियाको भनाइ छ । जिल्ला तथा समग्र प्रदेशकै विकासका लागि आफ्नो मन्त्रालयले योजना बनाएर काम गर्ने मन्त्री थपलियाको भनाइ छ । 

उद्योग वाणिज्य सङ्घ चितवनका द्वितीय उपाध्यक्ष एवं महोत्सव प्रवद्र्धन समिति संयोजक राजेन्द्र ओलीले महोत्सवमा रहेका सबै व्यापारिक स्टलको व्यापार राम्रो भएको बताउनुभयो । उहाँले महोत्सवमा राखिएका ४५० वटा स्टलको बीमा गरिएको भन्दै महोत्सव समग्रमा सफल भएको बताउनुभयो । महोत्सव अवलोकनका लागि ज्येष्ठ नगारिक, एकल महिला तथा अपाङ्गता भएका व्यक्तिलाई निःशुल्क प्रवेशको व्यवस्था गरिएको थियो भने विद्यार्थीलाई ३० रुपियाँ तथा अन्यलाई ६० रुपियाँ प्रवेश शुल्क लिइएको थियो ।