धर्बेन्द्र झा
धनुषा, माघ ४ गते । मधेश प्रदेशका मुख्यमन्त्री सरोजकुमार यादवले बुधबार विश्वासको मत लिँदै हुनु हुन्छ । आज (बुधबार) बस्ने प्रदेश सभाको बैठकमा मुख्यमन्त्री राउतले विश्वासको मत लिने कार्यसूची तय भएको प्रदेश सभा सचिवालयका निमित्त सचिव रन्जितकुमार यादवले जानकारी दिनुभयो ।
मुख्यमन्त्री यादवले ६३ जना प्रदेशसभा सदस्यको समर्थनसहितको पत्र प्रदेश प्रमुखसमक्ष दाबी प्रस्तुत गरेपछि यही पुस २७ गते संविधानको धारा १६८ को उपधारा २ बमोजिम प्रदेश प्रमुख हरिशंकर मिश्रले उहाँलाई मुख्यमन्त्रीमा नियुक्त गर्नु भएको हो ।
मुख्यमन्त्री यादवले गएको माघ ३ गते नै विश्वासको मत लिनका लागि प्रदेश सभा सचिवालयलाई पत्र पठाउनु भएको थियो । तर, माघ ३ गते प्रदेश सभामुख र उपसभामुखको निर्वाचन भएको कारण विश्वासको मत लिने कार्यसूची प्रदेश सभा सचिवालयले माघ ४ गतेको लागि सारिएको निमित्त सचिव यादवले जानकारी दिनुभयो ।
मुख्यमन्त्रीमा नियुक्त भएको मितिले ३० दिन भित्रमा विश्वासको मत लिनुपर्ने कानुनी बाध्यता रहेको कारण मुख्यमन्त्री यादवले आज विश्वासको लिँदै हुनु हुन्छ । मधेश प्रदेश सभामा हाल १०५ जना प्रदेश सभा सदस्य रहनु भएको छ ।
बहुमत प्राप्त गर्नका लागि ५२ जनाको समर्थन आवश्यक छ । मुख्यमन्त्री यादवलाई नेकपा (एमाले) को २३, जनता समाजवादी पार्टी (जसपा) नेपालको १६, जनमत पार्टीको १३, नेकपा (माओवादी केन्द्र) को ६ राष्ट्रिय प्रजातन्त्र पार्टी (राप्रपा), नागरिक उन्मुक्ति पार्टी, नेपाल सङ्घीय समाजवादी पार्टीको एक–एक र सुरिता साह ,अनिरुद्ध प्रसाद सिंह गरी दुई जना स्वतन्त्र प्रदेशसभा सदस्य गरी हाल ६३ जनाको समर्थन रहेको छ ।
मुख्यमन्त्री यादवलाई लोकतान्त्रिक समाजवादी पार्टीले पनि विश्वासको मत दिने जसपाका प्रदेश सभा सदस्य राम अशिष यादवले जानकारी दिनुभयो । हुन त मुख्यमन्त्री यादवले प्रमुख प्रतिपक्षी दल नेपाली कांग्रेस र प्रतिपक्षी दल एकीकृत समाजवादीलाई पत्र पठाएर विश्वासको मत दिनका लागि आग्रह गर्नु भएको छ । यता मुख्यमन्त्री यादवलाई विश्वासको मत दिने नदिने बारेमा संसदीय दलको बैठकमा छलफलपछि मात्रै भन्न मिल्ने कांग्रेसका प्रदेशसभा सदस्यहरूले जानकारी दिनुभएको छ ।
