गोरखापत्र समाचारदाता
काठमाडौँ, माघ ४ गते । नवनियुक्त कृषि तथा पशुपन्छी विकासमन्त्री ज्वालाकुमारी साहले पशुपन्छी बीमा अनुदान कार्यक्रमलाई डिजिटलाइज गर्न सफ्टवेयरमार्फत बीमा गर्ने र कृषकको विवरण राख्ने निर्णय गर्नुभएको छ ।
मङ्गलबार कृषि तथा पशुपन्छी विकासमन्त्रीको पदभार ग्रहण गर्दै यस्तो निर्णय गर्नुभएको हो । यस्तै गरी आर्थिक वर्ष २०७९/८० देखि २०८९/९०) को दशकलाई कृषि उत्पादन तथा लगानी दशक अभियानका रूपमा मनाउन सैद्धान्तिक सहमतिका लागि मन्त्रिपरिषद्मा पेस गर्न पनि निर्णय गर्नुभएको मन्त्रालयले जनाएको छ । पदभार ग्रहणका क्रममा उहाँले कृषि क्षेत्रको व्यवसायीकरण र उत्पादकत्व वृद्धिका लागि आफू प्रयासरत रहने बताउनुभएको थियो ।
