शान्ता अधिकारी
चितवन, पुस २६ गते । चितवन प्रहरीले जाली नोटसहित एक जना महिलालाई नियन्त्रणमा लिई अनुसन्धान शुरु गरेको जनाएको छ ।
जिल्ला प्रहरी कार्यालय चितवनका प्रवक्ता एवं प्रहरी नायब उपरीक्षक नरहरी अधिकारीले दिनुभएको जानकारीअनुसार सूचनाको आधारमा इलाका प्रहरी कार्यालय रत्ननगरबाट खटिएको प्रहरी टोलीले कालिका नगरपालिका १ की ४२ वर्षीया गङ्गा तामाङलाई एक हजार दरका १३७ थान खोटा नोटसहित नियन्त्रणमा लिन सफल भएको हो ।
आइतबार रातिको सूचनाको आधारमा उहाँको डेरा कोठामा खानतलासी गर्दा चल्ती गर्न लुकाई राखेको अवस्थामा ती खोटा नोट फेला परेको हो ।
पक्राउ परेकी महिलालाई प्रमाणसहित नियन्त्रणमा लिई चितवन जिल्ला अदालतबाट पक्राउ मितिबाटै लागू हुनेगरी मुद्रासम्बन्धी कसूरमा म्याद थप गरी अनुसन्धान शुरु गरेको प्रहरीले जानकारी दिएको छ ।
