काठमाडौं, पुस ८ गते । अवैध लागूऔषध कोकिन र चरेशको कारोबारमा संलग्न तीन जना विदेशीसहित छ जना पक्राउ परेका छन् ।
नेपाल प्रहरीको लागूऔषध नियन्त्रण ब्यूरोले शुक्रबार काठमाडौंमा पत्रकार सम्मेलन गरी सो कारोबारमा संलग्नहरुलाई सार्वजनिक गरेको हो ।
ब्राजिलबाट ल्याइएको ५ केजी ६ सय ग्राम कोकिनसहित युक्रेनकी ३२ वर्षीया डारिला एन्टोनेन्को र थाई नागरिक २५ वर्षीया एरिया फोनोकलाई गत पुस ६ गते पक्राउ गरी लागूऔषध नियन्त्रण ऐन, २०३३ बमोजिम अनुसन्धानको कामलाई अघि बढाइएको ब्यूरोका प्रमुख प्रहरी वरिष्ठ उपरीक्षक विकासराज खनालले जानकारी दिनुभयो ।
प्रहरीले बरामद गरेको कोकिनको बजार मूल्य १२ करोड नौ लाख ६० हजार रहेको पनि जनाएको छ ।
त्यसैगरी, ३३ केजी चरेशसहित चार जनालाई पनि प्रहरीले नियन्त्रणमा लिई कारबाही प्रक्रिया अघि बढाएको छ ।
गत पुस ४ गते काठमाडौंको चन्द्रागिरी बस्ने वर्ष ६४ का अल्कबहादुर तामाङ, धादिङका २७ वर्षकी स्यानी चेपाङ, सोही ठाउँका चम्पे चेपाङ र ६५ वर्षका भारतीय नागरिक शरप ल्याल्टसेनलाई पक्राउ गरिएको पनि लागूऔषध नियन्त्रण ब्यूरोले जनाएको छ ।
उनीहरुबाट बरामद गरिएको चरेशको बजार मूल्य १८ लाख १५ हजार रहेको ब्यूरोका प्रमुख प्रहरी वरिष्ठ उपरीक्षक खनालले बताउनुभयो ।
-original-thumb.jpg)
