धीरेन्द्रप्रसाद साह
जनकपुर, पुस ७ गते। मधेश प्रदेश सभाका नवनिर्वाचित सदस्यलाई ज्येष्ठ सदस्य गोविन्दबहादुर न्यौपानेले शपथग्रहण गराउनुहुने भएको छ। मधेश प्रदेश सभा सदस्य न्यौपाने ७१ वर्षीय हुनुहुन्छ।
नवनिर्वाचित प्रदेश सभा सदस्यमध्ये सबभन्दा ज्येष्ठ सदस्य न्यौपाने नै हुनुभएकोले उहाँलाई सर्वप्रथम प्रदेश प्रमुखले शपथ खुवाउने मधेश प्रदेश सभाका सचिव रञ्जितकुमार यादवले जानकारी दिनुभयो। न्यौपानेले शपथ खाएपछि न्यौपानेबाट अन्य प्रदेश सभा सदस्यलाई शपथ गराउने उहाँले बताउनुभयो।
निर्वाचन लगत्तै बिरामी हुनुभएका ज्येष्ठ सदस्य न्यौपाने उपचारपछि घरमा आराम गर्दै हुनुहुन्छ। केही कारणवश उहाँ आउन सक्नुभएन भने उहाँपछिको ७० वर्षीय ज्येष्ठ सदस्य शारदा शङ्करप्रसाद कलवारबाट शपथ गराउने सचिव यादवले बताउनुभयो।
सप्तरी क्षेत्र नम्बर ४ (क) नेकपा (एकीकृत समाजवादी)बाट न्यौपाने दोस्रो पटक निर्वाचित हुनुभएको हो। कलवार बारा क्षेत्र नम्बर २ (क) स्वतन्त्रबाट दोस्रो पटक निर्वाचित सभा सदस्य हुनुहुन्छ। यसअघि कलवार सङ्घीय समाजवादी फोरमको टिकटमा सोही क्षेत्रबाट निर्वाचित हुनुभएको थियो।
सचिव यादवका अनुसार प्रदेश प्रमुख हरिशङ्कर मिश्रले ज्येष्ठ सदस्यलाई पहिले शपथ गराउनुहुन्छ र ज्येष्ठ सदस्यबाट अन्य प्रदेशसभा सदस्यलाई शपथ गराउने व्यवस्था छ। अहिलेसम्म प्रदेशसभा सदस्यलाई शपथग्रहण गराउनेबारे मिति निर्धारण भएको छैन।
मधेश प्रदेश सभामा यस पटक १० वटा राजनीतिक दलको प्रतिनिधित्व कायम भएको छ। प्रदेश सभामा प्रत्यक्ष ६४ र समानुपातिक ४३ गरेर १०७ सभा सदस्य छन्
