करुणा उदासी ‘कृष्ण’
कात्तिक मैना पार गरी
मङ्सिर मैना लायो ।
किसानले खेतीपाती
भित्र्याउने दिन आयो ।
लहलह फाँटभरि
धान पाकेको छ
भण्डार गर्दै किसानले
सह डाकेको छ ।
खलो बनाइ खेतमा नै
धान थुप्राएर
कुनियोमा चाँगी चाँगी
राख्छन् त्यति खेर ।
मियो गाडी गोरु नारी
धान पराल माथि
धेरै हुन्छन् दाइँ गर्ने
दमेराका ताँती ।
कोही पराल छुट्याउँछन्
कोही धान बत्ताउँछन्
कुहिनाबाट घिउ चुहिने
खाजा पकाउँछन् ।
धान परालको भारी हाली
खाजा भूजा खान्छन्
दमेराले ओसारेर
सबै घर लान्छन् ।
परालको टौवा अनि
भकारीमा धान
किसानलाई गाह्रो छैन
पेटभरि खान ।
पाखो बारी कोदो खेती
खेतमा धान झुल्छ
त्यो दृश्य हेर्दा खेरी
सबै कुरा भुल्छ ।
