काभ्रेमा प्रतिनिधि सभाका २७ उम्मेदवारको जमानत जफत

काभ्रेपलान्चोक, मङ्सिर १५ गते । प्रतिनिधि सभा तथा प्रदेश सभा निर्वाचन अन्तर्गत काभ्रेपलान्चोक जिल्लामा प्रतिनिधि सभा सदस्यमा उम्मेदवारी दिनुभएका उम्मेदवारहरूमध्ये २७ उम्मेदवारको जमानत जफत भएको छ । यसै गरी जिल्लाका दुई क्षेत्रका प्रदेश सभामा उम्मेदवारी दिनुभएका २३ उम्मेदवारको जमानत जफत भएको छ । जिल्ला निर्वाचन कार्यालयका अनुसार जिल्लाको प्रतिनिधि सभा १ मा उम्मेदवारी दिनु भएका १७ मध्ये १४ जना र प्रतिनिधि सभा २ मा उम्मेदवारी दिनुभएका १६ मध्ये १३ जनाको जमानत जफत भएको जनाएको छ । 

जिल्लाको प्रतिनिधि सभा २ अन्तर्गतको प्रदेश सभा (क) तर्फ राप्रपाका रञ्जीव श्रेष्ठ, हाम्रो नेपाली पार्टीका ताराबहादुर कुँवर, मङ्गोल नेशनल अर्गनाईजेशनका मुस्कान लामा र नेमकिपाका सूर्यलाल तामाङले १० प्रतिशत मत नल्याएपछि जमानत जफत भएको छ । प्रदेश सभा (ख) तर्फ राप्रपाका रामकृष्ण लामा तामाङ, नेकपा मार्क्सवादी लेनिनवादीका दानबहादुर थापा, जनता समाजवादी पार्टी नेपालका वीरबहादुर तामाङ, मङ्गोल नेशनल अर्गनाइजेशनका सुकमान तामाङ र नेमकिपाका मुना तामाङको जमानत जफत भएको हो ।