मतपरिणाम सार्वजनिक गर्ने कार्यतालिका प्रभावित

काठमाडौँ, मङ्सिर १३ गते ।  निर्वाचन आयोगले स्याङ्जा र बाजुराको विवादित मतदान केन्द्रबारे निर्णय गर्न नसक्दा मतपरिणाम सार्वजनिक गर्ने कार्यतालिका प्रभावित भएको छ। निर्वाचन आयोगले मङ्सिर १२ गतेभित्र निर्वाचनको अन्तिम परिणाम सार्वजनिक गरिसक्ने तयारी गरेको थियो। 

आयोगका अनुसार सोमबारसम्म १५३ प्रतिनिधि सभा निर्वाचन क्षेत्रको परिणाम आइसकेको छ। नौ निर्वाचन क्षेत्रको गणना हुँदै छ। दोलखाका १० वटा मतदान केन्द्रमा पुनः मतदान गर्न निर्वाचन आयोगले निर्देशन दिएको छ। तर स्याङ्जा र बाजुराको विवादित मतदान केन्द्रमा पुनः मतदान गर्ने वा यथास्थितिमै गणना गर्नेसम्बन्धमा आयोगले निर्णय गर्न ढिलाइ गर्दा मतपरिणाम सार्वजनिक गर्ने कार्यतालिका प्रभावित भएको हो। आयोगका प्रवक्ता शालिग्राम शर्मा पौडेलले विवादित दुई जिल्लाको निर्णयसमेत छिट्टै आउने दाबी गर्नुभयो। आयोगले मङ्सिर ७ गतेभित्र प्रत्यक्ष (पहिलो हुने निर्वाचित हुने)तर्फका सबै र मङ्सिर १२ गतेभित्र समानुपातिकतर्फको सबै निर्वाचन क्षेत्रको गणना गर्ने आन्तरिक कार्यतालिका बनाएको थियो। त्यसैगरी मङ्सिर २० गतेभित्र मतपरिणामको प्रतिवेदन राष्ट्रपतिसमक्ष बुझाउने कार्यक्रम तय गरेको थियो। 

सोमबार बेलुकीसम्म प्रतिनिधि सभाको समानुपातिकतर्फ ९३ लाख ८४ हजार ४०३ मत गणना भइसकेको छ। एक करोड ७९ लाख ८८ हजार ५७० मतदाता रहेकोमा करिब ६० प्रतिशत मतदान हुँदा समानुपातिकतर्फ करिब एक करोड सात लाख ९३ हजार मतदान भएको छ। देशभरि समानुपातिकतर्फको करिब १५ लाख  मतगणना गर्न बाँकी हुनुपर्नेमा विवादित तीन जिल्लाको तीन निर्वाचन क्षेत्रको गणना प्रभावित भएको छ।