उच्चस्तरीय पर्यवेक्षण हुने

काठमाडौँ, मङ्सिर ३ गते । प्रतिनिधि सभा तथा प्रदेश सभा सदस्य निर्वाचनको अवलोकन गर्न दक्षिण एसियाली क्षेत्रीय सहयोग सङ्गठन (सार्क)का चार सदस्य राष्ट्रका प्रमुख निर्वाचन आयुक्तसहितको टोली नेपाल आएका छन् । श्रीलङ्का र दक्षिण कोरियाका एक/एक जना आयुक्त नेतृत्वको टोलीसमेत नेपाल आउन लागेका छन् । 

निर्वाचन आयोगका प्रवक्ता शालिग्राम शर्मा पौडेलका अनुसार बङ्गलादेश, भुटान, भारत र माल्दिभ्सका प्रमुख निर्वाचन आयुक्तसहितको टोलीले काठमाडौँ उपत्यका र नजिकका जिल्लाका विभिन्न मतदान केन्द्रमा मतदानको अवलोकन गर्नेछन् । आयोगका प्रवक्ता पौडेलले शनिबार नै निर्वाचन आयोगले प्रमुख आयुक्तहरूलाई निर्वाचनको प्राविधिक, व्यवस्थापकीय पक्षहरूबारे जानकारी दिने कार्यक्रम राखिएको बताउनुभयो । 

आयोगका उपसचिव कमल भट्टराईले चारै राष्ट्रका प्रमुख निर्वाचन आयुक्त शनिबार बिहानसम्म काठमाडौँ आइपुग्ने बताउनुभयो । माल्दिभ्सको निर्वाचन आयोगका अध्यक्ष भने काठमाडौँ आइसकेका छन् । 

दक्षिण कोरियाका निर्वाचन आयुक्त सोङगबेई कानको नेतृत्वमा तीन सदस्यीय टोली र माल्दिभ्सका निर्वाचन आयोगका अध्यक्ष फुवाद तौफिक नेतृत्वमा दुई सदस्यीय टोली शुक्रबार दिउँसो नेपाल आइपुगेका हुन् । भट्टराईले बङ्गलादेशका प्रमुख आयुक्त काजी हबिबुल अवाल, भारतका राजिव कुमार र भुटानका सोनाम तोप्गे शुक्रबार बेलुकी वा शनिबार बिहान आउनुहुने जानकारी दिनुभयो । 

बङ्गलादेशका प्रमुख आयुक्त अवाल पूर्वरक्षा सचिव हुनुहुन्छ । भारतका प्रमुख निर्वाचन आयुक्त ‘एसोसिएसन अफ वल्र्ड इलेक्टोरल बोडिज’का अध्यक्षसमेत हुनुहुन्छ ।  उपसचिव भट्टराईले भन्नुभयो, “चार राष्ट्रका प्रमुख आयुक्तसहितको १४ जनाको टोलीलाई दुई समूहमा राखेर आइतबार मतदान केन्द्रमा अवलोकन गर्ने व्यवस्था मिलाइएको छ, त्यसअघि शनिबार काठमाडौँ उपत्यकाको विभिन्न पर्यटकीय स्थलको भ्रमण गर्ने गरी कार्यक्रम तय भएको छ ।” प्रमुख आयुक्तको समूहले काठमाडौँ उपत्यकाको ललितपुर, भक्तपुर र काठमाडौँ तथा नजिकका जिल्लाका विभिन्न मतदान केन्द्रको अवलोकन गर्नेछ । प्रवक्ता पौडेलले भन्नुभयो, “एउटा समूहले आठदेखि नौवटा मतदान केन्द्रको मतदान अवलोकन गर्नेछ ।”चारै राष्ट्रका प्रमुख आयुक्तको नेपाल बसाइ र अवलोकनको व्यवस्थापन निर्वाचन आयोगले गरेको छ । चारै राष्ट्रका प्रमुख आयुक्त काठमाडौँस्थित सोल्टी होटलमा बस्नेछन् । दक्षिण कोरियाले भने अवलोकनको अनुमति मात्रै मागेकाले अवलोकन गर्न आउने आयुक्तको व्यवस्थापन दक्षिण कोरियाको कूटनीतिक नियोगले नै गर्ने आयोगले जनाएको छ । निर्वाचन अवलोकनपछि मङ्गलबार ६ गते सम्बन्धित राष्ट्रका प्रमुख आयुक्त र आयुक्त स्वदेश फर्किने कार्यक्रम छ । 

निर्वाचन आयोगले मङ्सिर ४ का लागि निर्धारित आम निर्वाचनमा सात हजार २१९ जना पर्यवेक्षक परिचालन हुने जनाएको छ । आयोगले निर्वाचन पर्यवेक्षणका लागि गत भदौ महिनामै आशय आह्वान गरेको थियो । जस बमोजिम दुईवटा अन्तर्राष्ट्रिय पर्यवेक्षक संस्थाका १२ जना र ४४ वटा स्वदेशी संस्थाका सात हजार २०७ जनाले पर्यवेक्षणको अनुमति लिएका छन् ।