गोरखापत्र अनलाइन
काठमाडौं, मङ्सिर २ गते । विभिन्न हातहतियारसहित तीन जनालाई बर्दिया प्रहरीले पक्राउ गरेको छ । बर्दियाको बासगढी नगरपालिका-२ सिमलघारीबाट विभिन्न हातहतियारसहित तीन जनालाई शुक्रबार प्रहरीले पक्राउ गरेको हो ।
पक्राउ पर्नेमा बासगढी नगरपालिका-२ सिमलघारी बस्ने ५२ वर्षीय रत्न बहादुर राना, ६२ वर्षीय प्रेम बहादुर मल्ल र ५५ वर्षीया लालमाया पुन रहेका छन् ।
उक्त स्थानमा हातहतियार लुकाएर राखेको सूचनाको आधारमा प्रहरी र बर्दिया राष्ट्रिय निकुञ्जका नेपाली सेनाको संयुक्त टोलीले तलासी गर्दा रत्न बहादुरको घरबाट भरुवा बन्दुक एक थान, प्रेम बहादुरको घरबाट बाह्रबोरको बन्दुक एक थान र सोही बन्दुकको नाल एक थान, रतुवाको सिङ र खुर तथा लालमायाको घरबाट भरुवा बन्दुक एक थान फेला पारी पक्राउ गरी थप अनुसन्धानका लागि बर्दिया राष्ट्रिय निकुञ्ज पठाइएको प्रहरी प्रधान कार्यालयलले जनाएको छ ।
