राधाकृष्ण डुम्रे
वालिङ, मङ्सिर १ गते । मङ्सिर ४ गते हुन गइरहेको प्रतिनिधिसभा र प्रदेशसभा सदस्य निर्वाचनका लागि स्याङ्जामा कर्मचारी मतदान स्थलतर्फ जान सुरु गरेका छन् । निर्वाचनका लागि आवश्यक सामग्री बोकेर कर्मचारी मतदानस्थलमा जान सुरु गरेका हुन् । मतदानस्थलका कर्मचारीले निर्वाचन सामग्री बुझेका कर्मचारी तोकिएको मतदान स्थलतर्फ लागेको स्याङ्जाका मुख्य निर्वाचन अधिकृत रोमाकान्त ज्ञवालीले जानकारी दिनुभयो ।
मुख्य निर्वाचन कार्यालय स्याङ्जाका प्रमुख गुरु मरासिनीले निर्वाचनका लागि स्याङ्जा क्षेत्र नं. १ मा मतदान अधिकृत १७१ जना, सहायक मतदान अधिकृत १७१ जना, सहायक स्तरका कर्मचारी ८५०, सहयोगी कर्मचारी १७१ र स्वयंसेवक ६७४ जना तथा क्षेत्र नं. २ मा मतदान अधिकृत १५० जना, सहायक मतदान अधिकृत १५० जना, सहायक स्तरका कर्मचारी ७४९ जना, सहयोगी कर्मचारी १५० जना र स्वयंसेवक ५९२ जना खटिएको जानकारी दिनुभयो ।
यस्तै, निर्वाचनका लागि १८ सय म्यादी प्रहरीसहित पाँच हजार सुरक्षाकर्मी खटिएको मरासिनीले जानकारी दिनुभयो । मतदानस्थल पुगेका कर्मचारीले बिहीबार नै सूचना प्रकाशन गर्ने, मतदानस्थलको तयारी गर्ने सर्वदलीय बैठक राख्ने लगायतका काम थाल्ने मुख्य निर्वाचन अधिकृत ज्ञवालीले जानकारी दिनुभयो ।
निर्वाचनका लागि खटिएका सुरक्षाकर्मी र कर्मचारी मतदान स्थलतर्फ लागेपछि चुनावी रौनक बढेको छ । निर्वाचनका लागि आवश्यक सबै तयारी पूरा भएकाले मतदानस्थल केन्द्रित तयारी सुरु भएको क्षेत्रं नं. २ का निर्वाचन अधिकृत रामचन्द्र शर्माले जानकारी दिनुभयो । कर्मचारीसँगै सुरक्षाकर्मीसमेत मतदानस्थल जान सुरु गरेको शर्माको भनाइ छ । जिल्लाभर १९९ मतदान स्थल र अस्थायी १ गरी २२१ मतदान केन्द्र छन् ।
योसँगै स्याङ्जामा निर्वाचन पूर्वको आवश्यक तयारी पूरा भएको छ । निर्वाचन सुरक्षा संवेदनशीलता तथा अन्य अवस्था अवलोकनका लागि यस जिल्लाका ११ वटै स्थानीय तहका अधिकांश मतदान स्थलको निरीक्षण गरिएको प्रमुख जिल्ला अधिकारी गङ्गाबहादुर क्षेत्रीले जानकारी दिनुभयो ।
प्रमुख जिल्ला अधिकारी क्षेत्रीलाई चुनावी सुरक्षाका लागि नेपाली सेना, सशस्त्र प्रहरी बल, नेपाल प्रहरी र म्यादी प्रहरी परिचालन गरिएको बताउनुभयो । प्रत्येक मतदान स्थलमा १० मिनेटभित्र पुग्ने गरी सशस्त्र प्रहरी बलको टोली तैनाथ गरिएको छ ।
निर्वाचनलाई धाँधलीरहित, भरपर्दो र शान्तिपूर्ण वातावरणमा सम्पन्न गराउनका लागि आवश्यक सुरक्षा रणनीतिका साथ सुरक्षा टोलीको व्यवस्था गरिएको प्रमुख जिल्ला अधिकारी क्षेत्रीको भनाइ छ ।
सुरक्षा निकायबाट मतदानस्थल तथा केन्द्रको अवस्था बुझ्ने, सूचना सङ्कलन गर्ने र स्थलगत निरीक्षण गरी चुनावी सुरक्षा चुनौती र जटिलताका बारेमा जानकारी लिने काम सकिएको उहाँले बताउनुभयो ।
गृह मन्त्रालयको निर्देशनअनुसार निर्वाचन निष्पक्ष, भयरहित र शान्तिपूर्ण रूपमा सम्पन्न गराउन एकीकृत तथा छुट्टाछुट्टै रणनीतिक सुरक्षा योजना निर्माण गरी संयन्त्र परिचालन गरिएको उहाँको भनाइ छ ।
उहाँले निर्वाचन विशेष सुरक्षा कार्ययोजना बनाएर निर्वाचन हुनुभन्दा पूर्व, मतदानको बेला र मतदान सम्पन्न भएपछिको प्रक्रिया तथा मतगणना समयमा सुरक्षा व्यवस्थालाई भरपर्दो बनाएको बताउनुभयो ।
-original-thumb.jpg)
