गोरखापत्र अनलाइन
काठमाडौं, कात्तिक २ गते । नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले अध्यक्ष पुष्पकमल दाहाललाई गोरखाबाट सबैभन्दा बढी मतान्तरले विजयी गराउने बताउनुभएको छ ।
माओवादीको बागमती प्रदेश समन्वय समितिले बुधबार यहाँ आयोजित निर्वाचन विशेष राजनीतिक–वैचारिक प्रशिक्षण कार्यक्रममा उहाँले विगतमा माओवादी अध्यक्ष दाहालले युवा अवस्थामा गोरखामा अध्यापन गराउनुभएको र जनयुद्धको केन्द्रीय कमिटी बैठक एवम् यसको प्राविधिक तयारी यहीबाट सुरु भएकाले उपलब्धि हुने उहाँको भनाइ छ ।
नेता श्रेष्ठले भन्नुभयो, “गठबन्धनको जटिलता र सीमा हामीलाई थाहा छ । तर, पूरा उत्साहका साथ सिट बाँडफाँट गरेर गठबन्धनका उम्मेदवारलाई विजयी बनाउन अगाडि बढ्न सहमति भएको छ ।”
अहिलेको चार दलीय गठबन्धन बाध्यात्मक परिस्थितिको उपज भएको नेता श्रेष्ठले बताउनुभयो । निर्वाचन धेरै खर्चिलो एवम् भड्किलो बन्दै गएको भन्नुहुँदै उहाँले प्रगतिशील, समाजवादी संस्कृति ह्रास भएको बताउनुभयो ।
