पोखरा, कात्तिक १ गते । गण्डकी प्रदेशमा जारी नवौँ राष्ट्रिय खेलकुदअन्तर्गत महिला क्रिकेटको कास्य पदक बागमती प्रदेशले प्राप्त गरेको छ । पोखरा रंगशालामा मंगलबार बिहान भएको खेलमा बागमतीले लुम्बिनी प्रदेशलाई सात विकेटले पराजित गरेको हो ।
टस हारेर पहिला ब्याटिङ गरेको लुम्बिनी प्रदेशले निर्धारित २० ओभरमा नौ विकेट गुमाएर ८७ रन बनायो । ८८ रनको विजय लक्ष्य बागमतीले १६.१ ओभरमा तीन विकेट गुमाएर पूरा गरेको थियो ।
बागमतीका लागि सुमन खतिवडाले अविजित ४१ रनको योगदान दिनुभयो । उहाँले २१ बलमा एक छक्का र ६ चौका प्रहार गर्नुभयो । यस्तै अस्मिता खरेलले २०, अनिशा मजाकोटीले अविजित १० तथा कञ्चन श्रेष्ठले १० रन बनाउनुभयो ।
बलिङतर्फ लुम्बिनीका लागि कृतिका मरासिनीले दुई तथा सुस्मिता भुषालले एक विकेट लिनुभयो । यसअघि लुम्बिनीका लागि ब्याटिङ गर्ने क्रममा सरस्वती जीएमले ३० रन बनाउनुभयो । अन्य ब्याटरले दोहोरो अंकमा रन बनाउन सकेनन् ।
बलिङतर्फ बागमतीका लागि विपिशा शाहीले चार, खुसी डङ्गोलले तीन तथा सोनी पाख्रिनले दुई विकेट लिनुभयो । आजै स्वर्णका लागि नेपाल पुलिस क्लब र एपीएफ क्लबबीच प्रतिस्पर्धा हुँदैछ ।
-original-thumb.jpg)
