केशवराज अधिकारी
नीलो नीलो आकाशमा
बादलको रुख ।
त्यही रुखमा हेर साथी
हात्तीजस्तो रूप ।
सुँढ पनि लामो लामो
ठूला ठूला कान ।
डल्ले डल्ले भुँडी ठूलो
लम्किँदै छ खान ।
हैन हैन छैन त्यस्तो
म त देख्छु भिन्नै ।
बाँदर हो जस्तो लाग्छ
सकेनौ कि चिन्नै ?
पुच्छर छ लामो लामो
उफ्रनलाई ठिक्क ।
तिम्रो कुरा सुन्दा सुन्दै
लागिसक्यो दिक्क ।
फेरि हेर्दा आकाशमा
बादलको रुख ।
त्यो रुख त फेरिएछ
अर्कै अर्कै रूप ।
दुई साथी गर्दै थिए
बात ढेलफेल ।
न बाँदर न छ हात्ती
समयको खेल ।
