काठमाडौं, साउन ७ गते । नेपालको कला संस्कृति तथा पर्यटन प्रवद्र्धनका लागि दक्षिण कोरियाको सिओलमा नेपाल कल्चर तथा शैक्षिक केन्द्रको संञ्चालन गरिएको छ । केन्द्र सञ्चालनले कोरियन नागरिकहरुका लागि नेपालको संस्कृतिबारे थप बुझ्न र समग्रमा नेपालको पर्यटन प्रवद्र्धन हुने अपेक्षा गरिएको छ ।
२०२२ जुलाई २१ का दिन दक्षिण कोरियाको सिओलमा संस्कृति पर्यटन तथा नागरिक उडड्यन मन्त्रालयका सचिव महेश्वर न्यौपाने, नेपाल पर्यटन बोर्डका सदस्यहरु मदन आचार्य र ङवाङङिमा शेर्पा र सिओलका डेपुटि मेयर लगायतले उक्त सेन्टरको संयुक्त रुपमा उद्घाटन गर्नु भएको थियो ।
सेन्टरको उद्घाटन गर्दै मन्त्रालयका सचिव महेश्वर न्यौपानेले कोरियामा सांस्कृतिक तथा शैक्षिक केन्द्र उद्घाटन हुनु नेपाली र कोरियाली दुवैका लागि खुशीको विषय भएको बताउनुभयो । उहाँले यसबाट नेपालबारे जान्न चाहने कोरियन नागरिकहरुलाई सहज हुनको साथै नेपालको प्रर्यटन प्रवद्र्धन हुने विश्वास व्यक्त गर्नभयो ।
बोर्डका सदस्य शेर्पाले कोभिड १९ पछिको नेपालको पर्यटन क्षेत्रको बारेमा जानकारी दिँदै नेपालले स्वास्थ्य सुरक्षा तथा अन्य प्राटोकलहरुको पालना गरकोले ढुक्कसँग नेपालको भ्रमण गर्न आग्रह गर्नुभयो। कोरियाका पर्यटन व्यवसायी,कलाकार,पत्रकार तथा नागरिक समाजका प्रतिनिधि सहभागी कार्यक्रममा चर्चित कोरियाली कमेडियन किम ब्याङ म्यानलाई कोरियाका लागि नेपाली पर्यटन सद्भावाना दूत नियुक्त गरिएको थियो ।
किम सन् २०१५ को महाभुकम्प पछि नेपालको नुवाकोटका विभिन्न स्थानमा विद्यालय पुनःनिर्माणमा सहभागी भएका थिए । सद्भावना दूत नियुक्त भएपछि किमले आफुले आफ्नो टिभी कार्यक्रममा नेपालका बारेमा सामग्री राख्ने तथा नेपालमा कोरियाली सिनेमा छायांकन गर्ने समेत बताएका छन् ।
शेर्पा, पर्यटन र समसामयिक विषयमा रिर्पोटिङ गर्नुहुन्छ।
