शंकर केसी
सल्यान, फागुन २७ गते । प्रतिनिधि सभा सदस्य निर्वाचनलाई शान्तिपूर्ण वातावरणमा सम्पन्न गर्न खटिएका निर्वाचन प्रहरीलाई बिदाइ तथा प्रशंसा पत्र वितरण गरिने भएको छ । जिल्ला प्रहरी कार्यालय सल्यानले निर्वाचन सुरक्षामा खटिएका प्रहरीहरूलाई सम्मानस्वरूप बिदाइ तथा प्रशंसा पत्र वितरण कार्यक्रम आयोजना गरिएको जनाएको छ ।
बिहीबार बिहान ११ बजे जिल्ला प्रहरी कार्यालय सल्यान परिसरमा आयोजना गरिएको कार्यक्रममा निर्वाचनका क्रममा विभिन्न स्थानमा खटिएर सेवा गरेका निर्वाचन प्रहरीहरूलाई उपस्थित हुन एक सूचना जारी गरेर जिल्ला प्रहरी कार्यालयको निर्वाचन सेलले आग्रह गरेको हो । निर्वाचन प्रहरीहरूलाई पोशाकमै अनिवार्य रूपमा उपस्थित हुन अनुरोध गरिएको छ ।
प्रतिनिधि सभा सदस्य निर्वाचनको सुरक्षाका लागि सल्यान जिल्लामा जम्मा एक हजार ४०६ जना निर्वाचन प्रहरी खटिएका थिए । जसमा नेपाल प्रहरी तर्फ १३१० र सशस्त्र प्रहरी तर्फ ९६ जना प्रहरी थिए । निर्वाचन अवधिभर उनीहरूले विभिन्न मतदान केन्द्र तथा संवेदनशील स्थानहरूमा खटिएर सुरक्षा व्यवस्थापनमा महत्त्वपूर्ण भूमिका निर्वाह गरेका थिए । कार्यक्रममार्फत निर्वाचन सुरक्षामा उल्लेखनीय योगदान पुर्याएका प्रहरीहरूलाई सम्मान गर्दै बिदाइ गरिने जिल्ला प्रहरी कार्यालय सल्यानले जनाएको छ ।
-original-thumb.jpg)