अनिल पराजुली
हेटौँडा, फागुन ३ गते । बागमती प्रदेश प्रमुख दीपकप्रसाद देवकोटाले पाशुपत क्षेत्रसहित देशका विभिन्न भागमा रहेका सांस्कृतिक तथा धार्मिक सम्पदाको यथोचित संरक्षण र सम्वर्धन गर्न सबैले प्रण गर्नुपर्ने बताउनुभएको छ ।
महाशिवरात्रि पर्व–२०८२ का अवसरमा आइतबार शुभकामना सन्देश जारी गर्दै उहाँले पुर्खाबाट नासोका रूपमा प्राप्त सम्पदालाई मौलिक स्वरूपमै भावीपुस्तासमक्ष हस्तान्तरण गर्नु हाम्रो दायित्व भएको स्पष्ट पार्नुभयो ।
उहाँले महाशिवरात्रि पर्वले नेपाली समाजलाई प्रगतिको मार्गमा अग्रसर गराउँदै आध्यात्मिक जागरणको नयाँ उज्यालो फैलाओस् भन्ने शुभकामना व्यक्त गर्नुभयो । साथै, बागमती सभ्यता विकास भएको बागमती नदीलाई स्वच्छ र सफा राख्न आजको दिनले सबैलाई प्रेरित गर्ने विश्वास व्यक्त गर्नुभयो ।
प्रदेश प्रमुख देवकोटाले वैदिक ग्रन्थहरूमा नेपाल भूमिसँग भगवान शिवको सम्बन्ध वर्णन गरिएको उल्लेख गर्दै शिव उत्पत्ति भएको विश्वास गरिने मानसखण्ड, शिवको विचरणस्थल मानिने हिमवतखण्ड तथा निवासस्थल मानिने पवित्र पशुपतिनाथ मन्दिर नेपालमै रहनु समस्त हिन्दु समुदायका लागि गौरवको विषय भएको बताउनुभयो ।
उहाँले आराध्यदेव पशुपतिनाथ एवं किराँतेश्वर महादेवलाई साक्षात् शिवस्वरूप मानेर आस्था राख्ने विश्वभरका श्रद्धालुहरूका लागि नेपाल सदैव आध्यात्मिक चिन्तनको केन्द्र रहिआएको धारणा व्यक्त गर्नुभयो ।
वैदिक परम्परामा शिवलाई मूलतः संहारका शक्तिका रूपमा मानिए पनि शिवशक्तिमा सौम्य र रौद्र दुवै स्वरूप समाहित रहेको उल्लेख गर्दै उहाँले निर्जल व्रत, रात्रि जागरण, चार प्रहरको पूजा तथा शिव महिमा कीर्तन शिवरात्रि पूजा–अर्चनाका मुख्य अङ्ग भएको बताउनुभयो । शिवरात्रिको पालनाले योग र मोक्ष प्राप्ति हुने धार्मिक विश्वास रहिआएको उहाँको भनाइ छ ।
-original-thumb.jpg)
