गोरखापत्र समाचारदाता
काठमाडौँ, पुस ९ गते । पर्वतीय क्षेत्रको अमूर्त संस्कृतिसँग सम्बन्धित रचनात्मक उत्पादनहरूलाई प्रवद्र्धन गर्ने उद्देश्यले विशेष सम्मेलन आयोजना गरिएको छ । ‘विश्वका अमूर्त सांस्कृतिक सम्पदा’ नाम दिइएको उक्त सम्मेलनमा नेपालको हिमाली क्षेत्र र चीनको सिजाङ (तिब्बत) स्वायत्त क्षेत्रको अमूर्त सांस्कृतिक सम्पदाको प्रवद्र्धन, सांस्कृतिक आदानप्रदान गर्दै दुई देशबीचको सम्बन्धलाई थप सुदृढ पार्ने विषयमा छलफल गरिएको थियो ।
कार्यक्रममा पूर्वमन्त्री तथा नेपाल ओलम्पिक समितिका अध्यक्ष जीवनराम श्रेष्ठले यस्तो सम्मेलनले दुई नजिकका देशहरु नेपाल र चीनबीचको सांस्कृतिक सम्बन्धलाई अझ प्रगाढ बनाउन मद्दत पुग्ने विश्वास व्यक्त गर्नुभयो । नेपाल हस्तकला महासंघका अध्यक्ष रवीन्द्र शाक्यले नेपालमा बनेका हस्तकला उत्पादनहरूलाई विश्वव्यापीकरण गर्न प्रयासरत रहेको बताउनुभयो ।
अरनिको समाजले आयोजना गरेको उक्त कार्यक्रममा बोल्नुहुँदै समाजका अध्यक्ष सुशील प्रजापतिले सम्मेलनको उद्देश्य सांस्कृतिक सम्पदाको संरक्षण र प्रवद्र्धन गर्नु रहेको बताउनुभयो । ‘विश्वका अमूर्त सांस्कृतिक सम्पदा’ नाम दिइएको उक्त कार्यक्रम दक्षिण एसिया नेटवर्क टेलिभिजनका प्रमुख कार्यकारी अधिकृत रमीला गौतम र चिनिया प्रतिनिधी छाई च्युनले संचालन गर्नुभएको थियो ।
