साहारा लिम्बू
फुङ्लिङ, पुस २ गते । मेरिङ्देन गाउँपालिकाले हरेक वर्ष पुस १ देखि ५ गतेसम्म लाग्ने पुसे मेलाका लागि दुई दिन बिदा दिएको छ । निमित्त प्रमुख प्रशासकीय अधिकृत रत्नेश्वरप्रसाद शाहका अनुसार गाउँ कार्यपालिकाको निर्णय अनुसार पुस ३ र ४ गतेका लागि स्थानीय बिदा दिइएको हो ।
बिदाको दिन आकस्मिकबाहेक गाउँपालिका मातहतका सरकारी कार्यालय, सामुदायिक विद्यालय एवम् सङ्घ संस्थामा बिदा हुनेछ । मेला ५ दिन लाग्ने भए पनि यी दुई दिन विशेष भीड लाग्ने गरेको छ । मेलामा गाउँका कृषि उत्पादनदेखि पर्यटन क्षेत्रको प्रचारप्रसार, खेलकुद तथा मनोरञ्जनात्मक कार्यक्रम हुने गरेको छ ।
पुसे मेला ५२ वर्षदेखि लगातार लाग्दै आएको गाउँपालिका अध्यक्ष युकहाङ वीर हाङ्गाम (डम्बर) ले बताउनुभयो। मेलाको अवसरमा भलिबल प्रतियोगिता, ब्याडमिन्टन प्रतियोगिता तथा सांस्कृतिक कार्यक्रमसमेत हुने पुसे मेला सञ्चालन समिति अध्यक्ष हेम सिरेङ चोङ्बाङले जानकारी दिनुभयो ।
पुसे मेला मेरिङ्देन गाउँपालिका र आठराई त्रिवेणी गाउँपालिकाको सङ्गम स्थल जिल्लाको दोस्रो ठूलो बजार दोभान बजारमा लाग्ने गर्दछ ।
