इन्द्रकुमार श्रेष्ठ सरित्
सत्य बोल्दैनन् कोही
सबै भ्रमको खेती गर्नमै व्यस्त छन्
भ्रम रोपिरहेका छन्
भ्रम गोडिरहेका छन्
भ्रम नै काटिरहेका छन्
भ्रमको खेतीले
कति दिन छारकाप्रो हाल्ने हो ?
कति दिन आँखै धुन नदिएर
आँखै हेर्न नदिएर
सत्य लुकाइरहने हो ?
अँध्यारो जति नै गाढा भए पनि
भुकभुके उज्यालोसँगै
बिहानी त हुन्छ ।
भ्रमको जालोले छेकेर
के घामको उज्यालो पनि लुकाउँछौ ?
घामको उज्यालो र
समयको गतिलाई
कसले छेक्न सकेको छ र ?
कसले रोक्न सकेको छ र ?
तरहरा– सुनसरी
