प्रतिनिधि छनोट : कतै सर्वसम्मत, कतै चुनाव

बुटवल समाचारदाता

बुटवल, मङ्सिर १४ गते । नेकपा (एमाले) को ११ औँ महाधिवेशनका लागि लुम्बिनी प्रदेश अन्तर्गतका विभिन्न जिल्लामा प्रतिनिधि छनोट भइरहेको छ । एमाले लुम्बिनी प्रदेश कमिटी अध्यक्ष राधाकृष्ण कँडेलले महाधिवेशन प्रतिनिधि छनोटका लागि प्रदेशका सबै जिल्लामा सर्वसम्मत बनाउने प्रयास भए पनि सफल हुन नसकेको बताउनुभयो । उहाँका अनुसार केही जिल्लामा सर्वसम्मत प्रतिनिधि चयन भए पनि अधिकांश स्थानमा मतदानमार्फत छनोट गरिएको छ ।

लुम्बिनी प्रदेशका १२ जिल्लामध्ये रुपन्देही, कपिलवस्तु, बाँके, अर्घाखाँचीलगायतका जिल्लामा सर्वसम्मत हुन सकेन । यसैबिच दाङ समाचारदाता सन्तोष दहितका अनुसार (एमाले) को ११ औँ राष्ट्रिय महाधिवेशनका लागि दाङबाट सर्वसम्मत रूपमा प्रतिनिधि चयन गरिएको छ । जिल्लाका तीन वटै निर्वाचन क्षेत्रबाट २० जना र दलिततर्फबाट तीन जना गरी कुल २३ जना महाधिवेशन प्रतिनिधि सर्वसम्मत रूपमा चयन गरिएको हो । एमाले दाङका उपाध्यक्ष मनोहर बुढाथोकीका अनुसार निर्वाचन क्षेत्र नं. १ बाट खुलातर्फ राममणि पाण्डे, कुलबहादुर केसी, रत्न तिवारी श्रेष्ठ, घनश्याम चौधरी र महिलातर्फ सीता चौधरी (ए), सीता चौधरी (बी) तथा लक्ष्मी शर्मा निर्विरोध रूपमा चयन हुनुभएको हो ।

त्यसै गरी निर्वाचन क्षेत्र नं. २ बाट खुलातर्फ शिवकुमार आचार्य, सुदन केसी, देवबहादुर बस्नेत, भुवन चौधरी, भानसिं बुढा र महिलातर्फ रेखा केसी निर्विरोध रूपमा चयन भएका उपाध्यक्ष बुढाथोकीले बताउनुभयो । निर्वाचन क्षेत्र नं. ३ बाट खुलातर्फ हुकुमबहादुर बस्नेत, भुवनेश्वर पौडेल, सूर्यबहादुर डाँगी, मनोहर बुढाथोकी, आशिष योगी र महिलातर्फ तुलसा डाँगी पोख्रेल प्रतिनिधिमा चयन हुनुभएको छ । त्यसै गरी दलिततर्फ मानवबहादुर विश्वकर्मा, निर्मला विक र टङ्कबहादुर विक प्रतिनिधिमा चयन भएका छन् ।