तौलिहवा समाचारदाता
तौलिहवा (कपिलवस्तु), मङ्सिर १४ गते । कपिलवस्तुको वाणगङ्गा नदीको बगर किसानका लागि बदाम उत्पादन गरेर आम्दानी गर्ने राम्रो माध्यम बनेको छ । वाणगङ्गा नदीले बनाएको बगरमा दुई सयभन्दा बढी किसानले बदाम उत्पादन गरी राम्रो आम्दानी गर्दै आएका हुन् ।
बुद्धभूमि नगरपालिका–१०, धनकौली; महाराजगन्जको बरगदी बलरमवापुर, हरदौना, कजराहवा, कपिलवस्तु नगरपालिकाको बिठुवा, सौराहा, यशोधरा गाउँपालिकाको सिहाखोर, खोरिया बगरमा रहेको बलौटे माटोमा किसानले बदाम खेती गर्दै आएका छन् ।
तरकारी उत्पादनमा नमुना रहेको धनकौलीमा सबैभन्दा बढी बदाम खेती गरिन्छ । तेलहन बालीमा पर्ने बदाम खेतीको धनकौली पकेट क्षेत्रसमेत हो । अगुवा किसान बहराइची केवट अनुसार जिल्लामा २६ हेक्टर क्षेत्रमा बदाम खेती गर्ने गरिएको छ । त्यसको आधाभन्दा बढी भने धनकौलीमै छ । धनकौलीमा मात्र ५० भन्दा बढी किसान बदाम खेतीमा लागेको उहाँको भनाइ छ । “बदाम बेचेर मात्रै यहाँका किसानले ५० हजारदेखि डेढ लाखसम्म आम्दानी गर्छन्,” उहाँले भन्नुभयो ।
धनकौलीको धरमपुर, करमपुर मोतीनगर, लोहरौलागाउँका कृषकले उत्पादन गरेको बदाम धमाधम बिक्री गरिरहेका छन् । स्थानीय शोभा केवटले चार बिघामा लगाएको बदामबाट आफूले यस वर्ष ५० हजारको बदाम बिक्री गरेको बताउनुभयो । “बिक्रीको पनि समस्या छैन, मूल्य पनि राम्रो पाइने भएकाले बदाम खेती मन लाग्छ,” उहाँले भन्नुभयो । एक किलो काँचो बदामको सयदेखि १२० रुपियाँ थोकको भाउमा बदाम बिक्री भइरहेको उहाँको भनाइ छ ।
महाराजगन्जको बर्गदीघाटका गरिब मुसलमानले बदाम खेतीबाट आफूले हरेक बर्ष राम्रो आम्दानी गर्ने गरेको बताउनुभयो ।
अन्य खेतीका लागि कृषि ज्ञान केन्द्र र पालिकाले प्रोत्साहन र सहयोग गरे पनि बदामका लागि केही नगरेको कृषकको गुनासो छ । बढ्दै गएको जाडोसँगै स्थानीय बजारमा बदामको मागसमेत बढेको छ । माग बढेकाले आफ्नो उत्पादन बजारसम्म पु¥याउन किसान व्यस्त छन् ।
उत्पादित बदाम जिल्लासहित रुपन्देही, अर्घाखाँचीको बजारमा खपत हुने गरेको छ । कृषि ज्ञान केन्द्रका प्रमुख घनश्याम चौधरीले जिल्लामा अहिले पनि बदाम खेती निकै कम मात्रामा हुने गरेको बताउनुभयो । बदाम खेतीबारे कार्यालयमा कुनै तथ्याङ्क नरहेको उहाँको भनाइ छ । जिल्लामा २६ हेक्टर बदाम खेती हुने र जसबाट ५३ मेट्रिक टन बदाम उत्पादन हुने गरेको कृषक बताउँछन् । जिल्लामा भारतबाट समेत बदाम ल्याउने गरिएको छ ।
