सिराज खान
नेपालगन्ज, मङ्सिर १३ गते । देशका विभिन्न अस्पतालमा कार्यरत क्यान्सर रोग विशेषज्ञ चिकित्सकको सहभागितामा नेपालगन्जमा पहिलो पटक क्यान्सर रोगसम्बन्धी गोष्ठी तथा चिकित्सककीय सम्मेलन हुने भएको छ ।
सुशील कोइराला प्रखर क्यान्सर अस्पताल, खजुराको आयोजना र मसकुलोसकेलेटल अङ्कोलोजी सोसाइटी अफ नेपाल (मोसन) को सहआयोजना तथा अर्थोपेडिक एसाेसियसन (नोए) वेस्टर्न च्याप्टरको सहकार्यमा यही मङ्सिर २६ र २७ गते हड्डी, मांसपेसी तथा छाला सम्बन्धी क्यान्सरको बृहत् गोष्ठी तथा चिकित्सकीय सम्मेलन हुने भएको हो ।
पश्चिम नेपालमै पहिलो पटक आयोजना गरिने सो सम्मेलनमा क्यान्सर रोगबारे चिकित्सकबिच बृहत् अन्तरक्रिया हुने आयोजक समितिका संयोजक एमएसके अनकोसर्जन डा. गोपाल पौडेलले बताउनुभयो ।
सम्मेलनमा बाँके र बाँके आसपासका जिल्लामा रहेका चिकित्सक (सर्जन, प्याथोलोजिस्ट, अर्थोपेडिक, रेडियोलोजिस्ट, मेडिकल अङ्कोलोजिस्ट तथा रेडियसन अङ्कोलोजिस्ट) लाई सुशिल कोइराला प्रखर क्यान्सर अस्पतालले प्रदान गर्ने सेवाका बारेमा जानकारी प्रदान गर्नुका साथै विश्वस्तरमा (हड्डी, मांसपेशी तथा छाला सम्बन्धी क्यान्सर) को नयाँ प्रविधि र अभ्यासका बारेमा छलफल तथा आफूले काम गर्दा भोगेका आफ्ना भोगाइ साटासाट गरिने जनाइएको छ ।
सम्मेलनमा विषयगत विज्ञहरूले कार्यपत्र प्रस्तुत गर्ने कार्यक्रम रहेको आयोजक समितिका संयोजक एमएसके अनकोसर्जन डा. पौडेलले जानकारी गराउनुभयो । सम्मेलनमा भरतपुर, विराटनगर, काठमाडौँ, दाङ, सुर्खेत, कोहलपुर र नेपालगन्जमा कार्यरत क्यान्सरसम्बन्धी चिकित्सकको सहभागिता रहने छ ।
सुशिल कोइराला प्रखर क्यान्सर अस्पतालका क्लिनिकल अङ्कोलोजिस्ट एवं आयोजक समितिका सचिव डा. मुकेश यादवले पश्चिम नेपालमै पहिलो पटक हुन थालेको यो सम्मेलनले अस्पतालको प्रचार प्रसार र सेवाका बारेमा जानकारी दिने तथा चिकित्सकले खजुरामा बिरामी रिफर गर्ने आशा गरिएको बताउनुभयो ।
