काठमाडौँ, मङ्सिर १३ गते । नेपाल प्रिमियर लिग (एनपिएल)मा जितका लागि साविक विजेता जनकपुरले जितका लागि साविक उपविजेता सुदूरपश्चिम रोयल्सलाई एक सय ४६ रनको मध्यम लक्ष्य दिएको छ ।
त्रिवि क्रिकेट मैदान कीर्तिपुरमा टस जितेर पहिले ब्याटिङ रोजेको जनकपुरले निर्धारित २० ओभरमा आठ विकेटको क्षतिमा एक सय ४५ रन बनायो । जनकपुरका लागि सन्जय कृष्णमूर्तिले अर्धशतकीय इनिङ्स खेल्नुभयो । उहाँले ३८ बलमा चार चौका र दुई छक्काको सहयोगमा ५० रन बनाउनुभयो । यस्तै जान निकोल लफ्टी इटोनले ३९, आदित्य महताले १५, ओपनर माज सदाकतले १० र कप्तान वेयन पर्नेलले १४ रन बनाउनुभयो । जनकपुरले आज नियमित कप्तान अनिल शाहलाई आराम दिएर वेयनको कप्तानीमा खेलेको हो ।
बलिङमा सुदूरपश्चिमका अविनास बोहराले चार विकेट लिनुभयो । यस्तै स्कट कग्लेइजीनले तीन तथा कप्तान दीपेन्द्रसिंह ऐरीले एक विकेट लिनुभयो ।
जारी एनपिएलमा अपराजित सुदूरपश्चिम आज आफ्नो लय कायम राख्ने लक्ष्यमा छ । यता लगातार हार खेपेको जनकपुर सुदूरपश्चिमको लयमा पूर्णविराम लगाउँदै जितको स्वाद चाख्ने तरखरका छ । यसअघि चार खेलमा शतप्रतिशत जित निकालेको सुदूरपश्चिम आठ अङ्कसहित शीर्षस्थानमा छ । यसअघिका तीनवटै खेल गुमाएको जनकपुरले अङ्कको खाता खोल्न सकेको छैन ।
