शङ्कर केसी
सल्यान, मङ्सिर १३ गते । सल्यानको ऐतिहासिक खलङ्गा–शीतलपाटी पदमार्गको पुनः निर्माण तथा संरक्षण गरिने भएको छ । जिल्लाको शारदा नगरपालिकाले स्थानीयहरूको सहभागिता र लगानीमा खलङ्गा–लुहापिङ–शितलपाटी पदमार्गको पुनर्निर्माण तथा संरक्षणको पहल गर्ने निर्णय भएको हो ।
शनिबार श्रीनगरमा स्थानीयसँग छलफल भएको छ । सदरमुकाम खलङ्गा र शीतलपाटीलाई जोड्ने यो पदमार्गलाई व्यवस्थित संरचनासहित पुनः निर्माण गर्ने लक्ष्यसहित नगरपालिकाले स्थानीय सरोकारवालासँग सामुदायिक सहभागिता, लगानी मोडालिटी तथा दिगोपनाका सन्दर्भमा छलफल तथा परामर्श गरेको हो ।
सल्यान उद्योग वाणिज्य सङ्घ श्रीनगरको सभाहलमा सम्पन्न छलफलमा नगर प्रमुख प्रकाश भण्डारी, प्रमुख प्रशासकीय अधिकृत ओमप्रकाश देवकोटा, नगर प्रवक्ता राजेशकुमार शर्मालगायत स्थानीयसँग छलफल गरिएको छ ।
छलफलमा सहभागी नागरिकहरूले पदमार्ग पुनः निर्माणमा सहयोगको प्रतिबद्धता व्यक्त गरेको नगर प्रवक्ता राजेशकुमार शर्माले जानकारी दिनुभयो । “नागरिकहरू उत्साहित र सकारात्मक हुनुहुन्छ । प्राविधिक पक्ष र संरक्षकत्व नगरपालिकाले गर्ने कुरा भएको छ” उहाँले भन्नुभयो, “यसमा निर्माण समिति बनाएर स्थानीयहरूले कोषमा सहयोग रकम जम्मा गर्ने वा आफैँ निर्माण कार्यमा संलग्न हुन पाउने कुरा भएको छ ।”
