फडिन्द्र अधिकारी
लेखनाथ, मङ्सिर १३ गते । चाडपर्व, जात्रा र विभिन्न मौसमलाई समेत महोत्सवको रूपमा मनाउँदै आएको पर्यटन नगरी पोखरामा शनिबार दाइँ महोत्सव भएको छ । माछापुच्छ्रे र अन्नपूर्ण हिमालको काखमा रहेको पोखरा १९, पुरुञ्चौरको चुरुङ्गा फाँटमा दोस्रो दाइँ महोत्सव भएको हो ।
हरेक वर्ष दर्जनभन्दा बढी स्थानमा रोपाइँ महोत्सव हुँदै आएको पोखरामा गत वर्षबाट धान थन्क्याउने परम्परागत सीप प्रदर्शनसँगै पर्यटन प्रवर्धन गर्न दाइँ महोत्सव गरिएको हो ।
परम्परागत कृषि प्रणाली जोगाउँदै पर्यटनको प्रवर्धन गर्न महोत्सवले सघाउने अपेक्षा गरिएको छ । पोखराका पर्यटन सम्बद्ध सङ्घ, संस्थाको छाता सङ्गठन पोखरा पर्यटन परिषदको आयोजनामा पोखरा महानगरपालिका वडा नम्बर १९, पुरुञ्चौर चुरुङ्गामा भएको महोत्सवमा स्थानीय, पर्यटन व्यवसायी, कृषि सम्बद्ध विभिन्न निकायका प्रमुख र प्रतिनिधि उपस्थित भए ।
पोखरा महानगरका प्रमुख धनराज आचार्यले कुन्युको जुरो खोलेर सुरु गरेको महोत्सवमा पाँच हल गोरुले दाइँ गरिएको छ । स्थानीय युवासहित विदेशी पर्यटकले समेत दयरा बनी अनुभव लिए । स्थानीय कृषकहरूको मनोबल उच्च बनाउन पाँच सय मुरी, सय मुरी र ९८ मुरी धान उत्पादन गर्ने उत्कृष्ट किसानहरूलाई विशेष सम्मान गरियो ।
उत्कृष्ट गोरुपालक प्रतियोगिता, धान चुट्ने, परालको भारी बाध्ने, गुन्द्री बुन्ने लगायतका प्रतियोगितामा स्थानीय रमाए । प्रतियोगिताका विजेता, उपविजेता र तृतीयलाई नगद पुरस्कार प्रदान गरियो । महोत्सव हेर्न पुगेकाहरूले हिमालको काखमा परम्परागत खाजा सेल, तरकारीको मज्जा लिँदै दाइँ हेरे ।
युवा पुस्तालाई खेतीप्रति आकर्षित गर्दै कृषकको मनोबल बढाउन गरिएको महोत्सवलाई पोखरा महानगरले समेत सघाएको थियो । कृषियोग्य भूमि नासिँदै गएको पोखरा महानगरमा भएको यो महोत्सवका सहभागी स्थानीयले सो क्षेत्रमा सिँचाइको व्यवस्था नभएको, सडक साँघुरो भएको जस्ता समस्यासमेत उठाए ।
महोत्सवमा उपस्थित भएका स्थानीय वृद्धहरूले पुराना दिनको सम्झना गर्दै थिए भने युवाहरू दाइँका प्रक्रियाबारे चासो राख्दै थिए । रोपाइँ महोत्सव जस्तै पृथक महोत्सव भएको र अफसिजनका बेला पर्यटकीय गतिविधि हुने भएकाले यो महोत्सवलाई निरन्तरता दिइनु पर्नेमा सरोकारवालाको जोड छ । खुलेको हिमाललाई पृष्ठभूमिमा राखेर दाइँ महोत्सवमा आएकाहरू तस्बिर खिच्न व्यस्त बने ।
