सिरिजङ्गा गोल्डकपको खेल तालिका सार्वजनिक

चन्द्र पन्दाक

ताप्लेजुङ, मङ्सिर १३ गते। आउँदो मङ्सिर २३ गतेदेखि ताप्लेजुङको सिरिजङ्गा गाउँपालिकामा सञ्चालन हुने अन्तर्राष्ट्रिय आमन्त्रण सिरिजङ्गा गोल्डकप पुरुष फुटबल प्रतियोगिताको खेल तालिका सार्वजनिक गरिएको छ।

आयोजक तेल्लोक स्पोर्टिङ क्लबले सदरमुकाम शनिबार सदरमुकाम फुङ्लिङमा पत्रकार सम्मेलन गरी प्रतियोगिताको खेल तालिका सार्वजनिक गरेको हो। आयोजक क्लबका अध्यक्ष अर्जुन भट्टराई, जिल्ला खेलकुद विकास समितिका अध्यक्ष नरेन्द्रकुमार लिम्बू लगायतले खेल तालिका सार्वजनिक गर्नुभएको हो। 

सार्वजनिक गरिएको सिरिजङ्गा गोल्डकपको खेल तालिका अनुसार आयोजक तेल्लोक स्पोर्टिङ क्लब र इलामको रेडहर्ष फुटबल क्लबबिच उद्घाटन खेल हुने छ। दोस्रो खेल न्युस्टार बिर्तामोड झापा र वाईवाई पाँचथर फुटबल क्लबबिच हुने छ। यस्तै तेस्रो खेल पाहुना टोली भारत, सिलिगुढीको पारिजात फुटबल सङ्घ र मरिक फुटबल क्बल धरानबिच हुने छ।

प्रि–क्वार्टर फाइनलको अन्तिम खेल साँघुरीगढी फुटबल क्लब धनकुटा र म्याङ्लुङ स्पोर्टिङ क्लब तेह्रथुमबिच हुने आयोजक क्लबका अध्यक्ष भट्टराईले जानकारी दिनु्भयो। प्रि–क्वार्टर अर्थात पहिलो चरणको खेल सम्पन्न भएपछि मङ्सिर २७ गते पहिलो सेमिफाइनल र २८ गते दोस्रो सेमिफाइनल खेल हुने छ। प्रतियोगिताको फाइनल भने मङ्सिर २९ गते हुने छ।

प्रतियोगिताको विजेताले तीन लाख ३२१ रुपियाँ र उपविजेताले एक लाख ५० हजार ३२१ रुपियाँ नगद पुरस्कारका साथ ट्रफी, पदक र प्रमाणपत्र प्राप्त गर्ने छन्। विधागततर्फ सर्वाेकृष्ट खेलाडीसहित विभिन्न विधामा छनोट हुने खेलाडीलाई पनि पुरस्कार प्रदान गरिने आयोजकले जनाएको छ। किरात लिम्बू लिपिका प्रचारक, सिरिजङ्गा लिपि तथा याक्थुङ संस्कृतिका प्रणेता सिरिजङ्गासिंह थेबेको ३२१ औं जन्मजयन्तीको अवसरमा प्रतियोगिता आयोजना गर्न लागिएको हो।