सिराज खान
नेपालगन्ज, मङ्सिर ६ गते । बाँके जिल्लामा सञ्चालनमा रहेका स्पा, मसाज सेन्टर र कतिपय खाजा घरहरुमा समेत यौनजन्य अनैतिक गतिविधि बढ्दै गएको गुनासो सर्वसाधारणबाट उठ्न थालेपछि प्रहरीले निगरानी बढाएको छ ।
जिल्ला प्रहरी कार्यालय बाँकेले स्थानीयको गुनासोलाई ध्यानमा राखेर नेपालगन्ज र कोहलपुरमा रहेका स्पा, मसाज सेन्टर र खाजा घरहरुमा निगरानी बढाउँदै जाँदा केही ठाउँमा यौनजन्य अवैध गतिविधि भइरहेको पाइएको छ ।
सोही कारणले नेपालगन्ज र कोहलपुर क्षेत्रमा सञ्चालित स्पा, मसाज सेन्टर र खाजा घरमा प्रहरीले कडाइका साथ अनुगमन अभियान थालेको जिल्ला प्रहरी कार्यालय बाँकेका प्रहरी प्रवक्ता प्रहरी नायब उपरिक्षक दिपक पातलीले बताउनुभयो ।
उहाँले सोही अभियानअन्तर्गत कोहलपुर र नेपालगन्जका स्पा, मसाज सेन्टर र खाजाघरमा छापा मारेर प्रहरीले अवैध तथा गैर–व्यवसायिक क्रियाकलापमा संलग्न १८ जनालाई नियन्त्रणमा लिएको बताउनुभयो । तीमध्ये ११ जना महिला तथा सात जना पुरुष रहेका थिए ।
सो घट्नाले केही स्पा, मसाज सेन्टर र खाजाघरमा अवैध कार्य भइरहेको पुष्टि गरेपछि निगरानी र कडाई थप बढाइएको जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसीले बताउनुभयो ।
उहाँले केही दिनअघि मात्र प्रहरीले नेपालगन्जका चार होटलमा छापा मारेर वेश्यावृत्तिमा संलग्न ४५ जनालाई नियन्त्रणमा लिएको जनाउँदै त्यसैको निरन्तरता स्वरुप नेपालगन्ज र कोहलपुरका स्पा र खाजा घरमा छापा मारेको बताउनुभयो ।
प्रहरीले जिल्लाका केही होटल र स्पा, मसाज सेन्टर तथा क्यासिनोमा समेत निगरानी बढाएको जनाउँदै प्रहरी प्रमुख जिसीले अवैध कार्य भएको वा भइरहेको पाइएमा कडा कारबाही गरिने बताउनुभयो ।
नेपालगन्जका विभिन्न स्थानमा खुलेका स्पा र मसाज सेन्टरमा भारतीय नागरिकहरु बढी आउने गरेका छन् भने क्यासिनो त भारतीय नागरिकलाई नै लक्षित गरेर सञ्चालनमा ल्याइएको बताइएको छ ।
जेनजी आन्दोलनपछि बाँके जिल्लाको प्रहरी नेतृत्व परिवर्तन भएपछि जिल्लामा प्रहरीले गैरकानुनी र अवैध कार्य रोक्न कडाइ बढाउँदै लगेको पाइएको स्थानीय वासिन्दाको भनाइ छ ।
