बिकास अधिकारी
पश्चिम नवलपरासी, कात्तिक २० गते । पश्चिम नवलपरासीको सदरमुकाम परासीस्थित झरही खोला किनारमा तटबन्ध निर्माण कार्य सुरु गर्न जोखिम क्षेत्र पहिचान गरिएको छ । झरही पुलदेखि सन्डासम्म खोला किनारमा बाढी नियन्त्रण र काेरिडोर समेत निर्माण गर्नेगरी नगरपालिकाले काम गर्ने योजना बनाएको छ ।
सङ्घीय र प्रदेश सरकार सहितको लगानीमा झन्डै दुई करोड बजेट नदी नियन्त्रणका लागि प्राप्त भएकाले तत्काल काम थाल्न नगर प्रमुख धनपत यादवको नेतृत्वमा, वडाध्यक्ष निरज रौनियारसहित प्राविधिक टोली र स्थानीयवासीले खोलाको जोखिम क्षेत्र पहिचान गरेका हुन् । बढी क्षति पुग्न सक्ने र खोलाले कटान गरेको क्षेत्रबाट काम थाल्नेगरी ठेक्का आह्वान गरिने भएको नगर प्रमुख धनपत यादवले बताउनुभयो ।
‘हामीले खोला सफाइ गरेर अस्थाइ बाँध बाधेका थियौँ, अब बलियो संरचना निर्माण गर्नुपर्ने छ । तटबन्ध लगाएर कोरिडोर निर्माण गरी सौन्दर्यीकरण गर्ने योजना छ’ नगर प्रमुख यादवले भन्नुभयो, ‘ठुलो बजेट आवश्यक पर्ने भएकाले स्थानीय तहको प्रयासमा काम भइरहेको थियो, अहिले निरन्तरको प्रयास पछि बजेट विनियोजन भएको छ । अब तटबन्ध निर्माण सुरु हुन्छ ।’
स्थानीयवासीले नगर प्रमुखसँग खोलाले वर्षायाममा बढी क्षति गर्न सक्ने क्षेत्रलाई प्राथमिकता दिन आग्रह गरेका थिए । रामग्राम दुईका स्थानीय अमिरुल्लाह मियाँले तटबन्ध निर्माणपछि बल्ल बाढीको जोखिम कम हुने विश्वास व्यक्त गर्नुभयो । नगरपालिकाले बाढी नियन्त्रणका लागि हरेक वर्ष खोला सफाइ र अस्थाइ तटबन्ध बनाउँदै आएको थियो ।
चार वर्ष अगाडिको वर्षा याममा झरही खोलामा आएको बाढी बस्तीमा पस्दा परासीबजार जलमग्न भएको थियो । सो घटनापछि परासीवासीले झरही खोला नियन्त्रणको दरिलो संरचना निर्माण गर्न माग गर्दै आएका छन् । नगरपालिकाले आन्तरिक स्रोतले खोला सफाइ र अस्थाइ तटबन्ध बनाएर बाढी नियन्त्रणको काम गर्दैआएको थियो ।
