गोकर्ण दयाल
बैतडी, असोज ९ गते । संस्कृतमा आचार्य उत्तीर्ण गरेर बेरोजगार रहनुभएका बैतडीका आचार्य कृष्ण दमाईले नोकरी पाउनुभएको छ । उहाँलाई धनगढी उपमहानगरपालिकाले समावेशी शिक्षा सहजकर्तामा नियुक्ति गरेको छ ।
उहाँका विषयमा पहिलो पटक गोरखापत्रमा समाचार प्रकाशित भएपछि नेपालभरी चर्चा भएको थियो । बैतडीको शिवनाथ गाउँपालिका –५, बकुन्नामा जन्मनुभएका कृष्ण दमाईले संस्कृत विषयमा आचार्य (स्नातकोत्तर तह) उत्तीर्ण गर्नुभएको छ ।
उहाँलाई यसअघि पशुपति कोटीहोममा सम्मानसहित व्यसमा बसालेर प्रवचन दिने मौकासमेत दिइएको थियो । सोही बेला धनगढी उपमहानगरपालिकाले उहाँको नागरिक अभिनन्दन गरेको थियो ।
आचार्य कृष्ण दमाईको घरको आर्थिक अवस्था कमजोर भएकाले नोकरी दिने नगरप्रमुख गोपी हमालले घोषणा गर्नुभएको थियो । दलितले वेदपुराण पढ्नु हुँदैन भन्ने मान्यता बोकेको समाजमा हुर्कनु भएका दमाईले नेपाल संस्कृत विश्व विद्यालय विद्यापीठ लालझुण्डी, दाङबाट २०७८ सालमा संस्कृत साहित्यमा आचार्य उत्तीर्ण गर्नुभएको हो । उहाँले, संस्कृत विषय पढ्दा आफूले थुप्रै सङ्घर्ष गर्नुपरेको बताउनुभयो ।
केही समयदेखि विभिन्न धार्मीक अनुष्ठानमा सहभागी हुँदै आउनुभएका आचार्य दमाई परिवारको छाक टार्न कञ्चनपुरस्थित एक निजी विद्यालयमा पढाउने काम गर्दै आउनुभएको थियो । यहीबिचमा धनगढी उपमहानगरपालिकाले आफूलाई टिकाराम पार्की छात्रवृत्ति र जुठे दमाई छात्रवृत्ति कार्यक्रम सञ्चालनका लागि सहजकर्तामा नियुक्ति दिएपछि जीविका चलाउन सहज हुने उहाँले बताउनुभयो ।
नगरपालिकाले तोकेको जिम्मेवारी इमान्दारितापूर्वक निर्वाह गर्ने उहाँले प्रतिबद्धता जनाउनुभयो । उहाँलाई नगररपलिकाले शिक्षा, युवा तथा खेलकुद महाशाखा अन्तर्गत काम गर्नेगरी छैटौं तहमा नियुक्ति दिएको छ ।
बैतडीको दुर्गम गाउँमा गरिबी र विभेद सहन नसकेर कञ्चनपुरको भीमदत्त नगरपालिका –३. तिलकपुरमा बसाइँसरेका कृष्णले सुदूरपश्चिमबाट दाङ जिल्ला पुगेर संस्कृत विषय पढ्न ठुलो संङ्घर्ष गर्नुपरेको अनुभूति सुनाउनुभयो । त्यसमाथि दलितले संस्कृत पढेर के गर्छ ? भन्नेहरुबाटसमेत पीडित भएको बताउनुभयो ।
सानैमा आमाबुवा गुमाउनु पर्दा परिवारको आर्थिक अवस्था कमजोर भएकाले संस्कृत भाषामा कर्मकाण्ड र ज्योतिषी विद्याको पढाइ गर्न बाँकी रहेको उहाँले बताउनुभयो । नगरपालिकाले काम गर्ने अवसर दिएपछि थप अध्यययनका लागि टेवा पुग्ने उहाँले बताउनुभयो ।
-square-thumb.jpg)
-original-thumb.jpg)
