रवीन्द्र उप्रेती
बर्दिबास, भदौ १५ गते । डिभिजन वन कार्यालय महोत्तरीले जङ्गली क्षेत्रबाट वन्यजन्तुसहित पक्राउ परेका चार जनामाथि पहिलोपटक चोरी सिकारी सम्बन्धी वन मुद्दा दायर गरेको छ । बर्दिबास–१०, लक्ष्मीनियाँको जङ्गलबाट छ वटा मरेको दुम्सीसहित पक्राउ परेका सर्लाही ईश्वरपुर–३, भक्तिपुर नट टोलका अरुण मिस्त्री, रामस्वरूप मिस्त्री, उमेश मिस्त्री र ध्रुव मिस्त्रीमाथि मुद्दा दायर गरिएको हो ।
उनीहरूलाई राष्ट्रिय निकुञ्ज तथा वन्यजन्तु संरक्षण ऐन २०२९ बमोजिम ‘बिना अनुमति वन्यजन्तुको चोरी सिकार तथा ओसारपसार गरेको’ अभियोगमा कारबाही अघि बढाइएको वन कार्यालयले जनाएको छ ।
मुद्दाका अनुसन्धान अधिकृत एवं सव डिभिजन वन कार्यालय बर्दीबासका प्रमुख सिकिन्दर चौधरीका अनुसार जिल्ला न्यायाधिवक्ता कार्यालय महोत्तरीको सिफारिसमा चारै जनामाथि ऐनको दफा ११ बमोजिम अभियोग पत्र दायर गरिएको हो ।
सोही ऐनको दफा २६ (६) अनुसार अभियुक्तहरूलाई २० हजार रुपियाँ जरिवाना वा ६ महिनासम्म कैद वा दुवै सजायको माग दाबी गरिएको चौधरीले बताउनुभयो । ऐनको दफा २६ (६) ले बिना अनुज्ञापत्र (हन्टिङ लाइसेन्स) वन्यजन्तु पक्रने, मार्ने लगाएतका कार्य गर्न बर्जित गरेको छ । यद्यपि दुम्सी संरक्षित वन्यजन्तुको सूचीमा नरहेकोले चारै जनालाई जनही ३० हजार रुपैयाँ धरौटी लिई तारेखमा रिहा गरिएको वन कार्यालयले आइतबार (आज) जनाएको छ ।
उनीहरूसाथ पक्राउ परेका बा. ८८ प. ११६० र बा. ५६ प. २२४० नम्बरका दुई वटा मोटरसाइकल र सिकारमा प्रयोग गरिएका घरेलु हतियार भने जफत गरिएको चौधरीले बताउनुभयो ।
गत साउन २८ गते राति जनकपुरबाट लालबन्दीतर्फ जाने क्रममा डिभिजनल वन अधिकृत (डिएफओ) सन्तोष झाले दुई वटा मोटरसाइकलमा सवार ती चारै जनालाई मरेको दुम्सीसहित नियन्त्रणमा लिएर डिभिजन वन कार्यालय महोत्तरीको जिम्मा लगाउनु भएको थियो ।
घटनाको दुई साता लामो अनुसन्धानपछि पहिलोपटक चोरी सिकारी मुद्दा दायर गरेको अनुसन्धान अधिकृत चौधरीले जनाउनुभयो । पक्राउ परेका चारैजनाले दुम्सी कुनै पनि जिल्लाको जङ्गली क्षेत्रमा नभई धनुषा महेन्द्रनगरको पूर्वी क्षेत्रमा पर्ने हरिपुरको खेतमा मारेको दाबी गरेका छन् ।
